Christmas le Laksawng

Christmas a phak poh ah “present change” kan ti i laksawng thlennak kan ngei cio hna. Chuahni zong ni sunglawi ah kan chiah i laksawng kan i pe theu tawn.  Micheukhat cu thil manfak mi kan i pe hna i  cheukhat cu mandin mi kan i pe hna. Laksawmg kan i pek mi hi phaisa man in a tuak mi kan um bantuk in a laksawng sunlawinak in a tuak mi kan um ve. Laksawng ah manfakbik le a sunglawibik ah kei ka hmuh mi vun in hrawnh ta kan duh ve hna.

Mirang holh in laksawng ti mi hi “Present” asiloah “gift" tiah an ti. Hi ka zawn ah Present ti mi hi tlawmpal vun fianh ta ka duh rih. “Present” ti hi sullam phumthum, phunli a ngeimi a si. Cu lak ah “um” ti sullam ngeimi le “laksawng” ti sullam ngeimi kong lawng vunlanghter ko hna u sih. A dang present sullam hna hi cu vun chia ta rih hna u sih. Mi cheu cu chuahni ah laksawng pek, lamhlat um mi nih kuat kan uar. Laksawng a co tu lung zong a nuamhter ve i dawtnak zong a karhter ngai ve. Puai pakhat kan tuah ah siseh, chuahni lunglawmh thlacamnak kan tuah tik zongah kawhmi hna an rat lo ding khi puai tuah tu nih kan ttih cio mi a si. Bianabia ah kan chuahni, asiloah thitumnak puai ah kan chungkhar unau hna nih an mah pumpak pakhat hmanh tel loin laksawng thatha lawng kuat in lo le dum ah kan kal tak dih hna sehlaw a hodah aa nuam kho hnga. Mah nak cun laksawng loin a kan telpi mi hna cung hmanh ah khin kan i duh pi deuh cio ko hnga lo maw? Cucah laksawng thabik, a sunglawibik mi laksawng kan ti mi hi a thilri nak in kanmah pumpak in an pawng kam te ah kan  umpi, caan kan hmanpi khawhnak tu khi a si deuh.

Pathian nih profet hna hmang in biakamnak a tuah mi cu a Fapa Jesuh minung cannak in a thlinh. Mah a Fapa min cu Immanuel , " Pathian kan sin ah a um"( Mathai 1: 23) ti in auh a si. Christmas cu Pathian Fapa Bawi Jesuh Chuahni ah kan tuah mi a si. Mah Christmas ah Laksawng a sunglawibik mi cu amah Bawi Jesuh Immanuel kha a si. Kan sin ah a um timi mirang holh in present pek dih kan si. Cucaah mirum sifak thleidan nak umlo in minung kan zate pek mi laksawng sunglawibik cu Pathian kan sinah a um ti mi Immanuel kan Pathian hi a si.

Christmas cu present change laksawng thlen caan ah kan hman caah Pathian pek mi laksawng ka co cio cang. Kan nih hna nih teh zeibantuk laksawng dah Pathian sin ah kan pek ve cio hna lai? A cunglei  kan chim cang bantukin Pathian kan pek khawh ding a sunglawi bik mi cu amah he um ti khawh kha a si ko. Amah cu khawi ka ah dah kan hmuh khawh? Mithiang John nih a ti bang in Dawtnak ah hin a si. Dawtnak umnak poh ah ka Pathian a um. Dawtnak ai thawhkehnak hmun cu innchungkhar ah a si. Mah le innchungkhar cio in dawtnak hram thawh khawh i zuam hna u sih law pawngkam innpa chakthlang dawt i zuam hna u si. kan i dawtnak hi kan caan peknak in langhter hna u si. Caan kan i pek khawh lo sual a si ah cun ka laksawng hna hi pakpalawng men an si sual lai.

Pathian nih a kan umpinak hi kan laksawng tha bik a si bantuk in chuahni sunglawi ah kan dawtmi hna pawngkam umpiak hi laksawng thabik a si ve. A ra lai ding Christmas ah zeidang thilri nak in kan caanpek in laksawng pek khawh i zuam cio hna u sih. Christmas lawmhnak, deihnak le hnangamnak  na sin ah um ko seh. Amen