Chungkhar hna sinin cawnmi

Photo Credit

Nihin Bupi nih a kan thimpiak mi cathiang cu Matthew 1:1-17 a si; kan Bawipa Jesuh Khrih chuahkehnak kong le chungkhar kong a si. Jesuh Khrih chuahkehnak kong Matthew nih a langhter mi ah hin minung tampi min langhter an si i Abraham in thawk in Jesuh Khrih tiangin langhter a si. Abraham in thawk in Jesuh Khrih tiang langhter mi min hna ah hin kan theih bal mi min hna zong an i tel hna i kan theih tuk lomi min hna zong an i tel cio hna. Sining cawh tthup in a phunphun in a rak nung mi hna zong an si.

Minung cu kan sining hrimhrim ah hin theih hngalh duhnak lungthin a ngei mi kan si caah Chuahkehnak le phun konglam tial timi hi a huam ngai mi hna zong tampi kan um hna.

Minung kan hun si thawk in kan chungkhar kan pawngkam um mi hna sin in kan hmuh, kan theih mi hna zoh in umkal thutdir, chimrel ning cang hna hi cawn cio a si. Jesuh Khrih zong a chungkhar hna sin in tampi cawnnak a rak ngei ve. A nu Mary le a pa Joseph nih Pathian kong siseh, dawtnak kong siseh, nunning kong siseh, thlacam ning cang siseh, tbk, . . . tampi an rak cawnpiak mi a si ve.

Chikhat te hun i ruat ve hmanhlaw, nang teh na chungkhar hna sin in zeibantuk hna hi dah na rak cawn ve i nihin ni tiangin naa thanpi mi hna an si? Zeibantuk thatnak hna khi dah na chungkhar hna sin in na rak cohlaan? Pathian duhning in a nung mi chungkhar hna sin in a thangmi na si ah cun Pathian duh ning in a nung mi na si ko lai. Thla a cam mi hna chungkhar in a thangmi na si ah cun thlacam a huam mi na si ko lai.

Dawtmi u le nau hna, na chungkhar sining kha ruat than ve law na chungkhar hna caah thla campiak ve hna. Na chungkhar hna cung zongah lawmhnak bia chim ve.

Add new comment

1 + 0 =