Chungkhar sinak

Photo Credit

Minthang, min ngei hna he aa thei hngal mi si le i hawikomh hi minung sining in duh cio ngai mi a si tawn. Chungkhat-chungkhar chungah siseh, theih hngalh-hawikom hna chungah a laar ngaimi an um zongah kan lawmh pi cio ngai tawn ko hna. A si ahcun, an min thannak, an laarnak hna le an ngeihmi degree hna hi zungzal in an hmun kho hna lai tiah na ruat bal maw? 

Nihin Missa raithawinak chungah kan relmi thawngṭhabia (Mark 3:31-35) chungah Jesuh nih: “Zohhmanh u, khika ah hin ka nu le ka naule hna cu an um. Zeicahtiah Pathian nih tuah hna seh, tiah, a duhmi thil a tuahmi paoh cu ka nau, ka far le ka nu an si,” tiah a ti (Mk 3:34-35). Pathian hrimhrim nih a duhmi thil a tuahmi paoh cu a chungkhar mi an si tiah a timi hi kan caah zeitluk in dah lawmh awk a si. Minung chungkhar chung hmanh ah pakhat le pakhat kan i bawmh, kan i theihpiak thiam a si ahcun Pathian chinchin nih cun Amah nih a sermi kanmah hna caah zeitluk in dah a kan ruahpiak thiam deuh chinchin hnga? Cun, chungkhar pakhat hun si tikah hin roco khawhnak nawl zong hun ngeih a si fawn. Pathian chungkhar, fanu/pa sinak ding caah aho paoh caan ṭha (chance) kan ngei dih ko hna. A duhnak tuah ding lawng kha a si ko.

Pathian duhnak tuah ding kan i thim a si ahcun kanmah duhnak kha hnu lei ah chiah ding timi zong kha theih ding a si. Chim duhmi cu mah zawn lawng aa ruatmi si lo ding timi kha a si. Cucu Jesuh hrimhrim nih a nunnak in lam a kan hmuh sak cang mi zong a si. Bawipa nih a kan dawt, a kan zangfah bangin kan nih hna zong midang hna cungah zangfah thiamnak le zawnruah piak thiamnak lungthin kan ngeih khawh nak hnga ding caah Pathian duhnak lam kha zulh in thlacam zungzal awk a si. 

 

Add new comment

4 + 0 =