Cohlaan Ning

Voi khat cu ngunkhuai khawltu pawl le misual pawl kha a sinah tampi an ra i a bia kha an ngai. Farasi mi hna le Phungbia cawnpiaktu saya hna cu an zai i, “Hi pa hi misual mi kha a rak pomhlawm hna i rawl zong a eipi hna,” an ti. (Lk 15:1-2)

A sualmi a si tiah theihmi pakhat he lam ah i tong u law zeitindah na um hnga; na hrial hna hnga maw asiloah ṭha tein na chawn kho hnga maw? Jesuh nih cun mi sual mi an si tiah biaknak lei in rianṭuanmi hna nih an ruahmi hna kha a cohlaan hna i a komh ko hna. Inn len le rawl ei an sawm zongah an sin ah a kal i a ei ko (Matt 9:10-17; Mark 2:15-22; Luke 5:29-39). Cun rawl ei ṭi lawng siloin Pathian bia zong in a cawnpiak ko hna. Hi tin mi sual mi hna cungah zangfahnak a ngeih caah le a ṭhat caah Farasi mi hna le phungbia cawnpiaktu saya hna nih Jesuh kha cohlang kho loin a saulnak an kawl zungzal nak zong a si. 

Jesuh bantukin “misual” tiah ruah mi hna kha nang nih teh thangchiatnak ton tiangin na cohlang kho ve cang hna maw?

Pakhat khat nih sualnak an tuah ruangah siseh, palhnak an tuah ruangah siseh an cungah thin hun nak langhter ding le i hrocer nak tuah timi cu a fawi tukmi a si ko. Kan biakmi Pathian Jesuh Khrih nih cun midang cungah fawi tein sualnak a puh bal hna lo. “Lungsau tein an sualnak in an lung aa thleng hnga maw,” tiin a hngak zungzal tu a si (Lk 15:11-32; Matt 18:10-14).

Jesuh hnu zul kan si taktak a si ahcun Jesuh bangin lungsau tein lam a pial sual mi hna kha lam ding an panh ṭhan khawhnak hnga ding caah bawmh zungzal ve ding a si. Jesuh nih: “Mi nih kan cungah tuah hna seh ti nan duh bantuk khan midang cung zongah va tuah ve u,” tiah a kan ti. 

Jesuh nih a duh lo tuk mi le nunzia remh dingin a cawnpiak lengmang tawn mi cu “midang hna kha sual phawtnak le soiselnak tuah lo ding” kha a si. Hi sualnak hna hi Pathian sin phanh khawhnak ding caah lam a phit tu zong an si. Jesuh nih mah ṭhatnak lawng i hmuh in midang soisel a hmang mi Farasi mi hna kha a cohlang hna lo (Lk 18:9-14).

Dawtmi u le nau hna misual tiah theih mi hna kha zeitin dah na cohlaan hna ning an si? Na hrial hna maw, asiloah kei zong sual palhnak a ngei mi ka si ve ko, tiin zangfahnak lungthin he a cohlaang kho mi na si maw? Asiloah, an thangchiatnak lam lawng a kawl mi na si sual maw? 

Hmanung bik biaceihnak a tuah tu ding cu Jesuh Pathian lawng lawng hi a si ko. Kanmah kan si lo. Kan tuah hnga ding mi cu kanmah bangin a palh kho ve mi hna kha dawtnak lungthin le zangfahthiamnak lungthin he cohlaan ding kha a si ko. Midang cungah zangfahthiamnak lungthin na langhter khawh, na ngeih ve taktak a si ahcun Jesuh he aa lo chinchin mi na si ko lai.