Cuaithlai thiamnak

Marta le Mary u nau pahnih hna ah hin aho nih dah Jesuh a dawt deuh hnga? Nang teh na raut bal ve maw? Jesuh Khrih nih an inn ah a rak len lio hna ah khan Martha nih dawtnak lungthin he Jesuh caah a herh hnga mi vialte timhtuahnak a rak ngei i tuahsernak in a langhter. Mary nih cun Jesuh pawng te ah a tthu i bia a ruah, Jesuh chimmi hna kha a ngaih i a cawnpiak nak hna kha dai tein a lungthin chungin a ruat mi a rak si. An unau pahnih in Jesuh Khrih cu an rak dawt taktak ko.

Kan nih hna zong kan nunnak ah hin tuahsernak in siseh, dai tein khuaruah thiamnak in siseh cuaithlai thiam ngai kan herh cio ve. A tuah sawh lawng a ttuan sawh lawngin ttuan i zeibantuk ruah tthannak hmanh kan ngeih lo a si ah cun taksa lei in siseh, thlarau lei in siseh tthanchonak kan ngei kho lai lo. Kan ttuan pah in tuah cia mi hna cungah ruah thiam tthan nak kan ngeih a herh. Ka tuah mi hi a hmaan maw, ka chimmi bia hna hi an hmaan maw, midang caah harnak a pe tu a si sual hnga maw, tiin khuaruah tthan zungzal ding a si.

Nihin ni caah Bupi nih a kan thim piak mi cathiang (Lk 10:25-37) chung kan zoh tthan a si ah cun Samaria mittha bianabia kong kan hmuh. Tlangbawi pakhat, Levi mi pakhat, le Samaria mipa pakhat kong kan hmuh. Jesuh Khrih nih rumra huham he a um mi hna kha thangthat loin a thiang lomi miphun dang tiah ruah mi Samaria mipa pakhat tu kha a thangthat nak kong kan hmuh. A innpa, midang cungah a tuahsernak in a dawt nak kha a langhter caah a si.

Minung hi leng lei hmuhnak in pedan tah a hmang mi kan si tawn i thil sining tak kha kan hmu thiam tawn lo. Harsat caan, lung retheih caan, ngaihchiatnak tawn caan ah a kan bawmtu hna kha philh lo ding an si. Sihmanhsehlaw harsatnak tawn caan ah tlik tak a hmang mi minung zong an um tawn. Kha bantuk mi hna kha Khrihfa mi hna nih ngaihthiam khawh ding le an caah a herhmi thla campiak ding tu an si. Pathian aa bochan mi hna le a dawmi hna caah cun thluachuahnak a um zungzal ko. Khamhtu an hung um thiam zungzal ko.

Thil kan tuah mi hna cungah siseh, kan cung i a rak cangmi hna cungah siseh chikhat dai tein khua ruah tthan nak ngeih cio ding a si. Pathian nih kan caah a kan tuah piak mi thluachuah hna kha ruat tthan hna u sih law lawmhnak bia chim zungzal hna u sih. Samaria mittha pa bangin pawngkam a herh bau mi hna caah nung kho cio hna u sih.