Cucaah hi bantuk hin thla nan cam awk a si:

Bawipa bia nih nihin na nun lamkal ning thlen piak khawhnak hmual a ngei timi hi na zum kho maw?  Isaiah nih a timi cu: “Ka bia cu van in a rung tlami ruah le hawhra bantuk a si lai. Ruah le hawhra nih cun, van ah kir ṭhan ti loin vawlei kha an hnawnter i thlaici kha an khohter i an ṭhanter i thlaici tuhtu kha thlaici an pek hna i rawl eitu kha rawl an pek hna. Cu bantuk cu ka kaa in a chuakmi bia cu a si ve lai — ka sinah a lawngin a ra kir ṭhan lai lo, tuah seh tiah ka fialmi kha a tlolh lai lo i ka thlahhnawh chanmi thil ah khan a tlam a tling lai(Isaiah 55:10-11).”

Bawipa bia cu a rocar mi ram bantuk in a hak mi thinlung hmanh kha pemlak in a vih khawh i a hninghno mi thinlung ah a thleng kho tu a si. Bawipa bia kan cohlaan i kan chungah a hram kan bunh a si ah cun kan thinlung a kan thlen piak lai i Bawipa muisam keng in thianhlim nak lam lei ah a kan phanhter ko lai.

Bawipa nih a bia thiang in kan rauh ning cang, kan tuahser ning cang hna le kan thlacam ning cang hna kha thlen piak a kan duh. Mithiang Ambrose (AD 339-397) nih a rak ttial mi ah: Bible cathiang rel dingah caan pek i Bawipa chim mi bia kan theih khawh nak hnga ding caah rel mi cathiang hna kha thukpi in ruah a herh ning kong a rak ttial. “Bawipa he pehtlaih nak nan ngei hna lo maw? Zeiruangah dah Bawipa he bai nan i ruah hna lo? Bible cathiang relnak thawngin Bawipa cawnpiak mi bia hna kha kan nih nin cun kan ngaih hna” tiah a rak ti.

Bawipa kha ngamh sang ngai in naihkhawh a si ko. Zeicah kan ti a si ah cun, Bawipa cu fanu tlau fapa tlau inn lei an rak kir tthan tikah lunglawm tein a cohlang i a hngak pengtu a si caah a si. Cu a si caah Bawipa nih a hnu zultu hna sin in a kan cawnpiak mi “Vancung um kan Pa” thlacam nak kha kan cam ngamnak cu a si. Mithiang Paul nih: “zeicahtiah a kan pekmi Thiang Thlarau thawngin kan lung chungah Pathian nih a dawtnak cu a toih in a kan toih”(Rom 5:5) tiah a ti. Bawipa dawtnak cu mei bangin a alh i kan chung i a um mi ruahnak ttha lo vialte hna kha a kan khangh paik, a kan thianh piak dih i, kan chungah tthatnak hna le midang cung sual ngaihthiam khawhnak lungthin a kan pek caah a si.

Cu a si caah Bawipa cawn piak mi thlacamnak(Vancung um kan Pa) nih kan nih vialte hna a kan cawnpiak mi cu zeitin dah thla ttha tein kan cam thiam hna lai ti hi a si. Midang cungah thil na tuah piak mi hna kha an caah aa rem ko tiin maw na tuah piak hna; asilo ah Bawipa nih na cungah tthatnak a tuah bangin maw na tuah piak ve hna?

“Sual ngaihthiam na si ve nak hnga ding caah midang sual nak zong kha ngaithiam ve ko hna. Hi bantuk tuah ser nak ding caah hin taksa lei in zeibantuk tha bat nak zong a hlei in a um fawn lo. Tuah duhnak thinlung te lawng a herh mi a si ko. Baitak kan chim a si ah cun kan ral a si mi hna hmanh kha dawtnak thinlung he kan ngaihthiam hna a si ah cun an nih hna zong an lung an i thleng tthan hna lai i Bawipa sinah an rak kir tthan te ko lai.”