Dai tein Ngai hmanh

Photo Credit

Friday, December 18, 2020

Bawi Khrih ah dawtmi u le nau hna minung hna khamh kan sinak hnga ding caah Jesuh Khrih sual hram ngei lo in hrin a si nak hnga ding hi a biapi tuk mi a si. Jesuh Khrih cu mi nu le mi pa um ti nak in ngeih mi fa a si hrim hrim lo. Bawi nu Mary cu Thiang Thlarau Pathian thawngin nau a pawi i Khamhtu Jesuh Khrih kha a hrin. Zeiruangah dah ngaknu thiang in hrin a si tiah cun Jesuh Khrih cu hrin a si thawk in sualnak zeihmanh um lo in hrin a si nak hnga ding caah timh cia a si caah a si. Sualnak ngei lo in hrin a si nak cu a sual cang mi minung hna khamh khawh than kan si nak hnga ding caah a biapi tuk mi a si caah a si. Minung hna khamhtu ding Jusuh cu Amah hrimhrim sual nak a ngeih lo a hau.
Mary cu Joseph he i ham a si hnu ah Joseph nih nau a pawi a thieh, a hmuh tikah lungawtawm ngai in a um. Cu tikah Joseph nih a lungchung in thim ding pahnih a hun ruah.
Pakhat nak a ruah mi cu “Mary hi a thlithup in ka hlawt lai” timi le a pahnih nak ah “Hi bantuk zumhtlak a si lo mi nu hi Judah phunglam ning in lung in thi lak in chehter ding?” ti a si.
Joseph caah thim ding hi pahnih lawng maw a si hnga? Pathian nih a pathum nak thim ding a hmuhsak mi cu: “David tefa Joseph, Mary hi na nupi ca i lak awkah tih hlah. Zeicahtiah fa a pawimi hi Thiang Thlarau thawngin a si, zeicahtiah a mi kha an sualnak chungin a khamh hna lai”(Matt 1: 20-21) .
Dawtmi u le nau hna nifatin kan nunnak ah kan tuah tawn mi hna hi kan mah nih kan i thim i kan tuah tawn mi lawng te an si ko. Sihmanhsehlaw, Pathian nih a kan chimh hnga ding mi a pathum nak thim ding a um ko rih timi hi philh hna hlah u sih. Kan mah duhnak le ruahnak lawng kan tuah a si ah cun kan palh sual lai.
Pathum nak thim dingmi cu “mi zeihmah fahnak pek lo le ngeihchiatter lo in minung vialte caah thatnak a chuahter tu a si hnga ding mi thil tuah ding thim thiam khawh nak a si ko”.
Pathum nak thimnak kha Pathian sin in kan theih khawh nak hnga ding caah mithiang Joseph bantukin “tangdornak ngei in dai tein Pathian cawnpiak mi ngai hna u sih”. Kan nunnak ah thil tha lawng te a hung si te ko lai. Thluachuah tampi kan cungah a hung um ko lai.