Dam na duh maw?

Photo Credit

“Dam na duh maw?” Hi bia hi Jesuh nih kum 38 chung dam lo in a rak um mi pa sin ah a chimmi a si. Zeibantuk bia hal nak dah a si hnga!
Nihin i ruah ti ka duh mi cu Bawipa nih a chimmi: “Zohhmanh, atu cu na dam cang. Na sualnak kha ngol hna, cu lo ahcun hi nak thalo deuh nih an tlak sual lai”(Jn 5:14) tiah a ti mi hi a si. Kan umnak vawlei cungah hin sualnak le palhnak hna um hna hlah sehlaw cu zawtnak zong hi a um hnga lo. Sihmanhsehlaw, zawtnak paoh hi pakhat cio kan sual ruang le kan palh hna ruangah an si tiin ti khawh dih cu a si ve hrim lo.
Bawipa le a zultu hna biakinn lei an kal pah ah mitcaw cia in a chuakmi pakhat an hmuh tikah zultu hna nih Bawipa bia an rak hal mi cu: “Mitcaw in a chuahtertu hi aho sualnak dah a si? Amah sualnak maw a si a nu le a pa sualnak dah? tiah an ti. Jesuh nih cun, “A mitcawtnak hi amah sualnak ruangah siseh, a nu le a pa sualnak ruangah siseh a si lo. Pathian thawnnak cu amah damnak thawng hin a langh nakhnga caah a mit a cawt hi a si” ?”(Jn 9:1-3) tiah a ti hna.
Sihmanhsehlaw, kapkhat lei in kan zoh than tikah zawtnak le sualnak aa pehtlaih nak zong hi kan hmuh khawh. Bawipa nih cun hi Sual nak le zawtnak pahnih hna hi kan sin in hloh piak ding le hrawh piak dingin a rak ra tak ko. Bawipa nih Carpenaum khua ah mizaw tampi a damter hna tikah kan hmuh mi cu: “Hi a tuah mi hi, profet Isaiah nih, Amah hrimhrim nih kan zawtnak kha a phorh i kan dam lonak kha a kalpi” tiah a rak chimmi tlinternak caah khan a si” tiin (Matt 8:17) ah kan hmuh. Chim duhnak cu Bawipa nih kan zawtnak le kan sualnak a kan chanh cang ti nak zong a si. Ruah than ding a um mi cu: “Zei ruangah dah kan vawlei pi ah hin hi tluk in a zaw mi hi an tam rih ko hnga?”
A ruang cu, sualnak hna hi minung hna nih an tuah leng mang rih ruangah a si ko. James tial mi cathiang chungah kan hmuh than mi cu: “Nan lakah harnak a tongmi nan um ahcun, thla cam hna seh. A lung aa lawmmi nan um ahcun, thangthatnak hla sa hna seh. A zawmi nan um ahcun, Khrihfa upa kha au hna u law thla in campiak hna seh law Bawipa min in chiti kha in thuh hna seh. Zumhnak in thla an camnak nih khan a zawmi kha a damter lai; Bawipa nih damnak kha a pek than lai i sualnak a tuahmi kha ngaihthiam a si lai. Cucaah cun nan sualnak kha pakhat le pakhat i chim u law pakhat le pakhat thla i campiak u, cu ti nan tuah ahcun damnak nan hmuh lai. Mitha mi thlacamnak cu hmual a ngei” tiin (Jame 5:13-16) chungah kan hmuh.
James nih a langhter duh mi cu zawtnak le sualnak aa pehtlaih ning, cun sual ngaihchihnak le damnak aa pehtlaih nih hi a si. Cu a si caah, sual ngaihchihnak hi kan damnak hnga ding caah a biapi tuk mi a si. Cu hlei ah biatak sual ngaihchihnak a ngei mi hna Pathain hmai ah cotlak mi mitha an si caah an nih nih a hleiceh in (bonus) pekchap an si i an hmuh mi cu an thlacamnak hmual a ngei timi hi a si. Ngunkhuai khawltu pa le Farasi mi pa thlacamnak kan zoh tikah Bawipa nih a cohlaan mi cu: “Maw Pathian, kei misual cungah hin zaangfahnak ngei ko” tiah thla a cam mi ngunkhuai khawltu pa kha a si i: “Hihi kan chimh hna: Farasi mipa kha si loin hi pa tu hi a sualnak ngaihthiam in inn ah a timmi cu a si” tiah (Lk 18:13-14) Bawipa nih a ti.
Cu a si caah: “Zohhmanh, atu cu na dam cang. Na sualnak kha ngol hna, cu lo ahcun hi nak thalo deuh nih an tlak sual lai”(Jn 5:14) tiah Bawipa nih a ti bangin kan nih pakhat cio zong hi ulhnak caan lio ah hin biatak sual ngaihchihnak he Pathian sinah panh cio hna u sih. Taksa damnak le sual ngaihthiam nak Bawipa nih a kan pek ve ko lai.

Add new comment

1 + 0 =