Dawn hna hlah u

Jews miphun hna hi minung thleidan a hmang mi miphun an si tiah ti khawh a si. Zeicah kan ti a si ah cun Jesuh nih changreu 5 le nga 2 in minung 5000 rawl a rak dangh hna ah khan “nu le ngakchia tel loin”(Mk 6:44) timi kan hmuh. Chim duhnak cu nu le ngakchia hna hi cazin ah chiah lo le zei ah rel lo an si nak kha kan hmuh. Minung sinak cazin ah khumh lo an si ah cun nu le ngakchia hna nih hin an mah nawl in thil an tuah kho lo ti zong in ti khawh a si.

Hibantuk thleidannak a um nak hmun le ram in a hung tthang ve mi Jesuh nih nihin kan rel mi cathiang (Matt 19:13-15) ah cohlaan ning thar le cawnpiak nak thar in a cawnpiak hna nak kan hmuh. Jesuh nih a cawnpiak hna tikah zeibantuk thleidannak hmanh ngei loin a rak cohlaan ko hna.

A sin an rat pi hna mi ngakchia hna kha zultu hna nih an kham hna a hmuh tikah Jesuh nih, “Ngakchia cu ka sinah ra ko hna seh, dawn hna hlah u” tiah a ti hna. Hi tin ngakchia a rak rat pi tu hna zong hi an nu le an si hrimhrim lai ti cu a fiang ko. Ngakchia lawng si loin an nu le zong kha lunglawm tein a cohlaan ko hna. Nu pawl sining a cawisan nak zong a si.

Hi vawlei cungah hrinmi minung vialte hi Pathian fa lawng te kan si. Pathain lawnglawng hi ka sining cang a kan thei dihtu, a kan cohlaang dih tu a si i amah lawng hi kan Pa taktak cu a si. Jesuh nih a kan cawnpiak mi hna hi kan cohlaan thiam cio a si ah cun kan vawlei pi ah hin thleidannak a um hrimhrim lai lo. Pathian hmai ah cun minung vialte hi aa khat mi kan si dih ko. Thleidannak le buaibainak a chuahter tu cu Pathian he aa ralchan mi thil a tuah tu an si bangin Pathian a do tu Satan leikap in rian a ttuan tu zong  an si. Jesuh nih mikip kha a cohlaan hna i a sinah bawmhnak a hal mi hna zong kha an duhnak a tlinh piak dih ko hna.

Cuasicaah thleidannak lungthin a ngei mi cu Jesuh (Pathian) a do mi an si i rualrem tein dawtnak lungthin he rian a ttuan timi cu Pathian fa an si ti kha thei cio hna u sih. Bu khat le bu khat, phu khat le phu khat, kap pakhat le kap khat thelidannak lungthin ngeih loin Pathian sunpar lianngan nak a langhter kho tu si khawh i zuam cio hna u sih.