DAWTNAK ASIMI THIANG THLARAU

THIANG THLARAU PATHIAN CU DAWTNAK ASI

          “Dawtnak a ngeilomi nih Pathian kha an hngallo, Pathian cu dawtnak asi. Pakhat le pakhat kan idawt ahcun Pathian cu kan chungah a um i kan chungah a dawtnak cu atling (1Jn. 4:3,12).

Rome cakuat (Rom. 5:5) ah kan hmuhmi cu: “Kannih a kan pekmi Thiang Thlarau thawngin kan lungchung ah Pathian nih a dawtnak cu a toih in a kan toih” tiah Thiang Thlarau Pathian kha dawtnak asinak kha abikin a sawhter. Pathian nih Profet Jerimiah hmangin biathlam a pekmi cu “Cu caan a phak tikah ka pek telai mi biakamnak cu, Keimah an Pathian ka phunglam cu an chungah ka toih lai, an chungah ka chiah lai i an thinlung chungah ka ṭial lai, Keimah cu an Pathian ka silai, annih zong ka mi an si te lai (Jer. 31. 33) ti asi. Pathian dawtnak timi Thiang Thlarau Pathian kha kan thinlung chungah a chiahnak thawngin profet Jerimiah a chimmi Bible cu a rak tling.

          Hi konglam cu Pathian nih profet Joel hmangin Biathlam a pekmi a thlinnak zong asi ve. Biathlam a pekmi cu “Ni hmanungbik ahcun mi vialte kha ka Thlarau ka toih hna lai” (Joel 2:28, Lam. 2:17) a ti. Zumtu hna thinlung chungah a toihmi dawtnak asimi Thiang Thlarau cu Bible thar chanah Biakamnak Nawlbia thar asi.

          Zumtu hna thinlung chungah a toihmi, nawlbia thar asimi Thiang Thlarau Pathian thawngin zumtu hna thinlung chungah a ṭialmi Pathian nawlbia ‌asi (Jer. 31:33). Jesush Khrih cu kha nawlbia thar kha “Bawipa na Pathian kha na lungthin dihlak le na ruahnak dihlak in na dawt lai timi le na innpa cu nangmah naa dawt bantukin na dawt lai (Mt. 22:37, 39) tiah a rak chim. Hi biakamnak nawlbia thar kha zumtu na thinlung chungah Thiang Thlarau nih a ṭial caah, ‘Thiang Thlarau Pathian nawlbia’ tiah an rak auh. 2. John Paul II “Penticost; The law of the Spirit” General Audience, 9 August 1989, Also, John Paul II, The Spirit, Giver of life and love; a catechisis on the Creed. Vol.3 (Buston, MA; Pauline, 1996), 72-75, P. 73.

        St. Paul nih Korin khuami zumtu hna sin a kuatmi ca chungah “Nannih cu cahang in ṭialmi ca asilo, a nungmi Pathian nih Thlarau in a ṭial i lung cungah ṭiallo in titsa he a khahmi minung lungthin cungah a ṭialmi siseh, kan khawmhmi Jesuh Khrih ca asi (2Cor. 3:3). Cuti asi ahcun mithiang Paul cu Jesuh Khrih bia kha zumtu hna thinlung cungah a ṭialmi kha a chim duhmi asi i Jesuh Khrih bia cu Thlarau thawngin thinlung cungah khorhin ṭialmi Thiang Thlarau i nawlbia (the law of the Spirit) asi.

          Cuticun Thiang Thlarau Pathian cu zumtu hna thinlung uktu bawi ah a cang. Cu bawipa a umnak hmun, cu bawipa he pehtlai mi thil le cu bawipa rian pohpoh cu Pathian kha lungthin dihlak, ruahnak dihlak le dawtnak le innpa kha mah pum tlukin dawtnak timi Jesuh Khrih nawlbia he aa hlatlo. Khi nawlbia thar in pialnak ralchanhnak zeihmanh a um kho lo.

          Aruangcu

cu nawlbia thar cu Thiang thlarau thawngin pekmi nawlbia thar asi lawng siloin Thiang Thlarau Pathian cu, khi nawlbia thar asi caah asi.

          Hi ruangah Thiang Thlarau he pehtlaimi phungchimnak hna, tuahsernak hna cu cu nawlbia thar tangah a um zungzal awk asi.

          Mithiang Paul cawnpiaknak bangin “Khrih Jesuh he aa pehtlaimi nunnak a kan petu Thlarau phung nihcun sualnak le thihnak phung chung khan a kan luatter cang (Rom. 8:2). Thiang Thlarau cu kan thinlung chungah a um taktaknak kha fiangtein kan langhter cio lai. Zumtu hna thinlung cungah Thiang Thlarau in a ṭialmi biakamnak nawlbia asimi dawtnak cu a tanglei bangin asi.

          “Dawtnak cu a lung a sau, thlachiat a ruat, a nahchuhlo, a lung a puan lo i aa porhlaw lo, a thin a tawi lo, tla bulbal in khua a salo i amah zawn lawng aa ruat lo. Palhnak kha aa cinken peng lo. Sualnak cungah khan diriam in a umlo, biatak tu ah khan aa lawm. Zeizongte kha a thuhphenh thiam. Zeizong thil kha a zumh, zezongte ah aa ruahchan, zeizongte a in khawh, a lung a sau i thinfualnak a ngei, a lung a dong ballo. Dawtnak cu a dongh thiam lo. Dinfellonak a ngei ballo. Profet biachimnak um hmanhseh, holh thiehlo phunphun um hmanhseh, teikpan hngalh/thiamnak kan ngeihmi zong a dih lai (1Cor 13:4-8).

          Mithiang John Paul II nih a kan cawnpiakmi cu: Pathian kha kan nunnak dihlak in dawtnak le kan innpa kha mah pum bantuk in dawtnak cu Thiang Thlarau thawngin kan thinlung cungah ṭialmi biakamnak nawlbia thar asi. Cu nawlbia cu Pathian sinin a rami dawtnak asi. Cucaah Thiang Thlarau i bawmhnak thawng lawngin khi nawlbia thar kha kuttongh nunnak ah kan hman khawh lai. Kan thinlung chungah a toihmi, Pathian dawtnak asimi Thiang Thlarau Pathian (Rom 5:5) thawngin cu nawlbia thar cu kuttongh nunnak ah zulh le tuahnak in kan nunkhawhnak asi. 3. John Pawl ii, The Spirit, Giver life and love, 75.

Cubangin Thiang Thlarau cu zumtu hna lamhmuhsaktu bawi asi lawng siloin zumtu hna nunnak kha nifate a remhpiaktu Bawi asi. Cu pinah Khrih he hmunkhatte siawk caah nifate a thianghlim deuh mi, phunthiang deuhmi nunnak leiah a kan hnuh i a kan phawrhtu asi.4. cf. John LPaul II, The spirit give of Live and love. 74. Cucaah Thiang Thlarau Pathian he pehtlaih in phungchim mi hna, Thiang Thlarau Pathian minchalh in tuahmi thil pohpoh dawtnak he aahlat mi um kho hrimhrim lai lo.

Add new comment

1 + 2 =