Dawtnak caah Dawtnak(1)

Dawt na si ahcun nang zong nih dawtnak in na lehrulh ve a hau. Dawtnak caah cun dawtnak kha pe ve ko. "Nangmah cu kan dawt cang. Nang zong nih na ka dawt ve lai. Na lungthin a dih umnak in ka ngah khawhnak hnga ka lungthin kha a dihumnak in kan pek. Kei cu dawtnak cungah ri ka khiak lo, nang zong nih dawtnak ah a ri khaik ve hlah".

Kei cu vawlei ah hin dawtnak kawl ah ka ra, dawtnak hal ah ka ra. Zeicatiah zalong tein dawtnak kha ka ttaam, ka haal. Nanmah kha zeizong vialte kan pek cang hna. Vailamtah lampi ah ka thlanhripi le ka thazang, ka thabatnak vialte kan pek dih cang hna. Kalvari tlang cungah ka thi cu ka thlet dih cikcek cang. Ka dawt hringhran mi ka nu hmanh kha laksawng sungah kan pek cang hna. A thiangmi Bawipa thisa sacrament ah keimah le keimah kaa pe cang khah! Kan dawtnak hna hi na ka zumh khawhnak hnga a hmanung bik ah zeidah ka tuah rih hnga! Ka theih cang, Ka Lungthin Thiang kha kan pek hna lai. Mitcaw dawtnak a hrampi a si mi ka lungthin kha kan pek hna lai. Ka lungthin kha laksawng in kan pek hna hnu zongah nan ka dawt hlei lo ahcun zeitik ah dah nan ka dawt te lai?

"Dawtnak i ngaihchia ngai a si mi ttahhraam thawng cu na lungthin chungah a khenh in aa khenh kha na theih lai. A lianngan mi khamh duhnak saduhthah, a faktuk mi temhfahnak aw, caan khatte ah dawtnak zangfahnak le vailamtah cungin Jesuh nih "Ka ti a haal" (Jn. 19:28) ti in a au thawng kha na theih lai. Nanmah sinin dawtnak kha ka ttaam haal. Ka dawtnak kha nan cungah kan tawih cang hna.

Keimah caah dinawk cu ka pe ve u. A ri umlo mi thlarau lei rumnak kan pekmi hna kha sunhlawih tuah u. Kalvari tlang cung i a alh hluahmah mi ka hmur cungah dapti bang a si hngami dawtnak he a khat mi lungthin hna kha ka caah ka kawlpiak tuah u. Ka thi aa nehmi ka luchin in hlingnge pakhat te kha na cohlang duh lai maw? Ka vailam tung i a pelpawi pakhat te kha na cohlang duh lai maw? Dawtnak lawnglawng ah kan pekmi a si. Dawtnak lawng lawng ah ttuanvo kan pek mi a si.

Nangmah nih hma a pumi ka Lungthin Thiang i a laksawng kha lunglawm thanuam tein na cohlan ahcun nang cu ka vel laksawng hna kha na cungah tawih awkah nawl na ka onh a si. "Anih nih a dik a hmaanmi ka dawtnak hi a nahchuah. Tukforhnak ka in tikah nannih cu keimah he fek tein a um mi nan si. Ka Pa nih keimah caah ram kha a ka timhpiak bantuk in kei zongnih nanmah caah kan timhpiak ve hna lai. Nannih cu ka ram chungah cun nan ei nan din awk a si (Lk. 22:28).