Dawtnak lungthin he ṭihzahnak

Photo Credit

Nihin ni caah Bupi nih a kan thimpiak mi cathiang Luke 12:1-7 hi ṭha tein ruah cio kan hau. Jesuh nih, “Thuhmi thil paoh hi hun an si dih lai i biathli paohpaoh hi hngalh an si dih lai,” tiah a ti. Zeitin dah kan ruah ning a si cio hnga? Sining vialte le a thli tein tuah mi thil vialte langhter dih an si lai ding cu ṭih a nung mi a si ko. Jesuh nih, “Mui lakah nan chimmi cu chun ceu ah theih an si lai, cun innka nan i khar khumhnak khaan chungah a thli tein nan chimi cu inn cung in aupi an si lai,” (Lk 12:3) tiah a ti. Hitin thil a si ding mi hi minung sining in cun ṭih cio mi thil an si ko.

Sihmanhsehlaw Bawipa nih ṭih taktak dingmi cu zeidah a si timi kha pehzulh in a kan chimh rih. “Kan chimh hna, ka duale, pum cu a that kho nain a hnuah cu nak ṭhalo deuh zeihmanh a tuah kho ti lomi cu ṭih hna hlah u. Ṭih awk cu ahodah a si kha kan hmuhsak hna lai: Thah hnu i hell zong i thlak khawhnak nawl a ngeimi Pathian hi a si. Asi, amah cu va ṭih u, tiah kan chimh hna” (Lk 12:4-5). Pathian kha ṭih ding a si tiah a timi hi ṭih thlorh in ṭih ti siloin “dawtnak lungthin he Pathian kha ṭih zah ding” timi kha a chim duh mi a si. A kan dawt caah a kan sertu Pathian nih cun zeitikhmanh ah a kan hlaw bal lai lo; cun a kan philh fawn lai lo. 

 Kan tuahser mi vialte Pathian hmaiah langhter dih an si lai ding zong hi ningzah ter a kan duh caah siloin kan sual kan palhnak in i mer ṭhan dingin le Pathian duh ning in kan nun khawh ṭhannak hnga ding caah a si ko. Zeitluk hmanh in kanmah le kanmah "ka sual lo, sualnak ka ngei lo" tiah i pheh hmanh u sihlaw Bawipa Pathian nih cun kan sining vialte cu a theih dih taktak mi a si ko. Amah hmaika ah zeibantuk thil hmanh thuh khawh an si lo. 

Kan tuahmi thil langhter ṭhan ding timi zong hi Pathian nih kan sualnak in kan i ngaihchih ṭhan ding caah a kan duhpiak caah a si. Ser hram thawh ka i kan rak thianhlim bantukin khan kan si ṭha ding kha Bawipa Pathian nih a kan duh piak mi a si. 

 

Add new comment

11 + 9 =