Dawtnak lungthin he tuahsernak cungah Bawipa aa lawm

“Nannih cu Messiah zultu nan si ruangah mi nih ti hrai khat zong an in pek hna ahcun, cu hna cu laksawng hmu loin an um hrimhrim lai lo, ti kha va philh hlah u.” (Mark 9:41)

Nihin ni caah Bupi nih a kan thimpiakmi cathiang (Mark 9:41-50) hi pakhat cio kan nunnak ah ruah lengmang ding le thazaang lak lengmang ding caah a tha ngai mi cathiang a si. Nifatin kan nunnak ah kan i thimmi nun ning lam hna le kan tuah mi hna hi hmai lei kan nunnak caan caah biakhiak tu an si te lai.

Pakhat cio kan nunning ah hin zeibantuk thil hna kha dah kan i thim hna i kan zulh hna; mah zawn lawng aa ruatmi maw kan si, midang zawn zong a ruat piak thiamtu dah kan si? Kan i thimmi sining nih lunglawmhnak le daihnak a kan pek i lungthin taksa damnak zong a kan pek.

Jesuh nih a zultu hna sinah siseh, kan nih pakhat cio cungah siseh a kan duh piakmi le aa ruahchanmi cu zangfah thiamnak lungthin kan ngeih ding hi a si. Zangfah dawtnak lungthin he kan tuahsermi thil hna cungah Bawipa Pathian nih zeitikhmanh ah a kan philhpiak bal lai lo. Zumhnak aa lo lomi, biaknak aa lo lomi, phunglam aa lo lomi, zei tluk hmanh in i lawh lonak sining hna um hmanh hna sehlaw, midang cungah thatnak kan tuah mi ana. cungah Bawipa Pathian cu aa lawm zungzal ko. Cubantuk tuahsernak hna cung zongah cu Pathian nih a kan theih piak zungzal lai i a kan lawmh zungzal ko lai.

Zangfah dawtnak lungthin tak tein mikip cungah thil tha tuah khawh i zuam zungzal ding a si.