Dawtnak Nawlbia

Nihin ni caah kan relmi thawngṭhabia cu (Matt 22:34-40) a si i “Phungbia chungah hin zei nawlbia hi dah a ngan bikmi a si?” timi biahal nak kong a si. Minung hna nih Pathian he i rem kan duh a si ahcun Pathain pekmi nawlbia hna kan zulh ding hrimhrim an si i cu nawlbia hna cu an dihlak in kan caah an biapi dih. Sihmahsehlaw Bawipa nih amah he i rem, i pehtlaih nak dingin a duh mi a si caah “Amah Pathian kha kan lungthin dihlak, kan ruahnak dihlak le kan thazaang dihlak in kan dawh ding” kha a kan duh piak hmasat mi a si. Cupin ah minung hna khamh a duh tu Pathian nih minung pakhat le pakhat kan i dawt ve hrimhrim ding a si nak zong kha biapi ngai in a pahnih nak ah a langhter rih. 

Cuasicaah kannih Khrihfa mi hna nih “Dawtnak” timi cu kan i nunpi ding le kan i hruk-aih ding hrimhrim a si. Pathian cu kan nunnak zeizong vialte lak ah a pakhat nak bikah chiah zungzal ding a si. Dawt kan duh mi Pathian kha kan mit in kan hmuh khawh lo tikah zeitindah kan tuah hna lai? Fiang tein kan theih ding a simi cu “Pathian cu kan pawngkam te ah kan mit in kan hmuh khawh mi hna sin khan a um ko. Sifak santlailo, bawmhchanh a herhmi hna, mizaw hna, midang nih zei an rello an hlawt mi hna le inn le lo a ngei lomi mi harsa hna sin khan a um ko.” Biatakin le thuk deuh in kan vun ruah ṭhan a si ahcun, kan pawngkam a ummi hna sin in Pathian cu kan sin ah aa phuang zungzal ko. 

‘Biakinn ah a kal kho deuhmi, cheu hra cheukhat a pe kho deuhmi, cun midang hna nak in thla a cam kho deuh tiah ruahmi hna khi Pathian duh mi phung ning in a nung taktak mi an si’ tiah kan ti kho dih hna lo. Zeicah tiah cun Farasi mi hna zong cuticun an tuah khawh ve ko. Sihmanhsehlaw Jesuh nih an tuahsernak hna le an lungput a duh lo caah sual a rak phawt lengmang hna zong kha theih ding a si. Mi zei ah rel tuk lomi nuhmei nu te lungput le Pathian sin a rak put mi chaw(tangka)  tlawm te cungah khan Jesuh nih a thangṭhat deuh zong kha philh lo ding a si. 

Khrihfa tak kan si, Pathian duhmi a tuah tu kan si tiah kan i ruah a si ahcun Samaria miṭha pa nunzia te kha kan nunnak ah a langh ve a herh. Kokek ral ruangah siseh, raltuk ruangah siseh harsatnak a tong mi hna bawh, innlo a ngei ti lomi hna riahnak hmunhma khur piak, ei-din a ngei lomi hna ei-din pek, a zaw-a dam lomi hna bawmh le zohkhenh, pawngkam a ummi innpa hna he rualrem tein um kha Bawipa nih a kan duh piak mi a si. Bawipa nih hnahchuahnak lungthin a duh lo. Dawtnak lungthin he pakhat le pakhat kan i bawmh kha a duh mi a si. 

Hitin innpa chak-thlang hna he rualrem tein um, cun dawtnak lungthin he pakhat le pakhat kan i bawmh mi hna ah hin Bawipa thawngṭhabia kha kan phuan ve hi a si ko. Khuakhaan chimrel tuaktaan nak le tuahsernak hna ah hin lungthin a thian lo a si ahcun cucu Pathian nawlbia buar a si. 

Na innpa kha na dawt khawh lo a si ahcun Pathian zongkha na daw kho bal lai lo. Pathian na dawt khawh lo a si ahcun “tuahser, chimrel mi vialte hna hi cu pakpalawng menmen an si ko.” Lung rethei vansang in a ummi hna kha an zawn na ruah piak thiam kho cang hna maw? Tanglei an tlak chin nak hnga ding caah aa zuammi le khua a khang mi na si ahcun Pathian nawlbia a zul lomi na si. Zeicah tiah cun Bawipa nawlbia “Dawnak” naa nunpi khawh lo ruangah a si.

Cuasicaah Jesuh nih: “ ‘Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,’ ti hi a ngan bik le a biapi bik nawlbia cu a si. A hun changtu biapi bik nawlbia cu, cu bantuk ṭhiamṭhiam cu a si i ‘Na innpa cu nangmah naa dawt bantukin na dawt lai,’ ti hi a si,” (Matt 22:37-39) tiah a ti.