DAWTNAK RIANTUAN(1)

Khrih nih, Bawipa, Bawipa, a ti mi paoh nih Pathian pennak ah an lut lai ti a si lo, vancung i a ummi ka Pa duhnak a tuahmi lawngnih Pathian pennak chungah an lut lai," a ti(Mt. 7:21). Cucu Patian lung tongin nunnak a si.
Pathian a duhnak tuah cu phunhnih in a um. Zumh awk bia vialte kha zumh le tuahawk bia vialte tuahnak a si. Zumhnak le tuahnak a si.
Bawi Jesuh nih, "Pathian nih tuah seh ti an duhmi hna cu a thlahmi zumh kha a si," a ti(Jn. 6:29). Asi, Bawi Jesuh Khrih cu Pathian nih a rak thlahmi a Fapa ngeihchunh a si tiah kan zumh. Cun Pathian Fapa cu Pathian a si caah a cawnpiakmi vialte zong pakhat hmanh bau loin biatak a si tiah kan pawm dih. Thlacam zong kan i zuam, Sacrament hna zong kan hmuh lengmang. A thlah mi zumh cu mah vial a si ko cang lo maw? Khamhnak caah a za ko cang lo maw?
A tling rih lo, a za rih lo. Mahnak in tamdeuh tuah a hau rih. A nawlbia kha zulh a hau rih. Tuchan Khrihfa tampi nih nawlbia ti hi a theih in theih kan duh lo; tuahsernak ti zong theih an duh lo. An duhmi cu Bible ningin nun, asiloah, thawng`habia nun ti hi a si. Ziaza zong an duh lo, Nunnak lawng an duh. Nawlbia zulh a siloah tuahsernak cu palhnak nganbik ah an ruah i Bible nun a siloah Thawngtthabia nun cu a sangbik ah an chiah. A ngaite ahcun pakhat te a si ko. Aa dang lo.
Ti le rawl cu nunnak a nun awk caah a si i thlacamnak le sacrament hna cu thlarau nunnak a nun awk caah a si. Ti le rawl kha tthate in a ei a dingmi nih a ngan a dam i pumsa caah rian a ttuan khawh bantuk in thlacamnak le sacrament hna tthate in a tuah a hmang lengmang mi cu a thlarau nunnak caah rian a ttuan khawh. Zumhnak ah a nung kho. Khrih nunnak ngeih lo cu Pathian duhnak tuahnak ah a lang. Phundang in cun a nawlbia asiloah Thawngtthabia nunnak ah a lang. Khrih nunah hnuk ding liomi a si maw, a siloah, nu tling pa tling a si cang maw ti cu hi bantuk in theih khawh a si, khuamui chung i a nungmi maw ceunak chung i anungmi ti a lang lai(Eph. 5:8-9, 11). Thei a tlaimi a si maw si lo ti a lang lai(Mk. 11:12-14).
Cucaah dawtnak rianttuan cu a herh. Khrih nih nawlbia kha pahnih ah a tthen; Pathian dawt le innpa dawtnak in(Mk. 12:28-31). Pathian a dawmi nih a nawlbia kha a zulh bantuk in a innpa a dawmi nih a innpa cungah tthatlonak zeihmanh a tuah lo. Innpa dawtnak timi cu minung hawi cung dawtnak kha a si. Hi kongah Bawi Jesuh a nawlbia cu keimah nih kan dawt hna bangin pakhat le pakhat i daw u, ti hi a si(Jn. 15:12).
Dawtnak rianttuan a herh ning kha biaceihnak ah kan hmuh; "Ka rawl a ttam i rawl nan kan pek, ka ti a hal i ti nan ka pek, khual ka si nan ka tlunter, hnipuan ka ngeilo i nan ka pek, ka zaw i nan ka zohkhenh, thawng ka tla i nan ka len(Mt. 25:35-36).
……… Kan peh tthan lai …….
Catial tu/- Rev. Fr. Paul