A dongh tiangin a fekmi cu khamh an si lai (Mk 24:13)

Photo Credit

Nihin Missa raithawinak chungah kan relmi cathiang (Sirah 2:1-11; Mark 9:30-37) hna chungah Jesuh(Pathian) hnu zulh ruangah kan  rak i ruah lomi hneksak-harsatnak hna ton khawh an si timi kha kan hmuh khawh. Hneksak nak hna le temhinnak, tukforhnak hna cu nikhatkhat ahcun kan ton hrimhrim cio ko hna lai. A tuanh le a tlai lawng a si ko.  

Sui (gold) timi cu mei ah ṭha tein hneksak lawngah a thiangmi le a man a sunglawi mi thil ah aa chuah bangin kan nunnak ah harsatnak phunphun kan ton mi hna nih hin a man a sung deuhmi minung a kan siter ve tawn. Hneksaknak le harsatnak caan hna kha a dongh tiangin intuar khawhnak thazang, cun a fim, a ṭhawng mi lungthin hna kha kannih hna nih kan ngeih ding a herh mi a si. Harsatnak kan tonmi hna nih hin kan lung a fimter deuh bangin a ṭhawn zong a kan ṭhawnter deuh fawn.

Jesuh hnu zul Khrihfa mi kan si hna bangin Jesuh a ral zungzal tu Satan hneksak nak le tukforhnak cu kan nunnak ah kan ton hrimhrim ko lai. Peter cakuat chungah kan hmuh mi cu: “Fimhring tein um u, ralring tein um u! Nan ral Khuachia cu , seh awk kawl ah , chiandeih bangin a vak cuahmah ko” (1Pet 5:8). Cuasicaah lungfim tein le hlau tein um kan herh bangin timhcia(ready) te zongin um ding kan herh. Harsat-hneksaknak le tukforhnak kan ton tikah, intuar khawhnak thazang le fimnak Jesuh sinah kan hal zungzal ding zong a si. 

Hneksak nak le harsatnak hna cu kan ton hrimhrim ko hna lai. Sihmanhsehlaw, Jesuh nih bia a kan kamhmi, “A dongh tiangin a fekmi cu khamh an si lai,” (Mk 24:13) timi kha philh lo ding a si. 

Add new comment

13 + 5 =