A dongh tiangin zumhnak ah fek tein aa thlaih mi cu khamh an si lai

“Mi kip nih nannih cu keimah ruangah an i huat hna lai, sihmanhsehlaw a dongh tiangin aa tlaih pengmi cu khamhnak nan hmu lai”(Matt 10:22).

Minung dang hna i huat lawng si loin mah chungkhar hna lila nih hlawtnak ton a si zongah a dongh tiangin Pathian cungah zumhfek tein a um mi hna cu khamh an si lai. Joseph cu a unau rual hna i huat nak le hlawtnak a rak tong, sihmanhsehlaw Pathian aa bochannak le a zumhnak cungah dingfel tein a um khawh zungzal caah Pathian nih thluachuah nak tampi a pek.

Joseph kong hi kan zoh tikah Jesuh Khrih cawnpiak mi bianabia chung bangin “Fapa tlau” (Lk 15:11-32)ti khawh a si. Sihmanhsehlaw, Jesuh cawnpiak mi bianabia chung fapa tlau pa nun ning he cu sining aa lo hrimhrim lo. Jesuh cawnpiak mi bianabia chung fapa tlau pa cu amah duh in a pa sin in a chuak i a kal mi a si, sihmahsehlaw Joseph cu a unau rual hna i huat ruangah le hlawt (zuar) ruangah a tlau mi a si. Fapa tlau pakhat pa cu miphun dang ramdang ah a duhduh in khua a va sa a chawva “ro” kha a va sawksam dih. Joseph cu nuamnak hna kha a hrial khawh hna ruangah chawva “ro” rumnak thluachuah a hmu mi a si. Fapa tlau pakhat pa cu inn lei a hungkir tikah a u pa thin a hun ter. Sihmahsehlaw, Joseph cu a chungkhar hna he an i ton tthan tikah a unau hna i dawtnak a hmu mi a si. A dongh tiangin Pathian cungah zumh fek tein le lungthin ttha tein a nun khawh ruangah a nunzia tuanbia ttial mi aa dawh.

“Zeicahtiah a hramthawk tein ralttha ngaiin kan rak zumhmi kha fek tein a dongh tiang kan i tlaih ahcun, kan dihlak in Khrih hawi kan si dih zungzal lai”(Heb 3:114). Jesuh Khrih cu thluachuahnak hrampi a si bangin a hawikom kan si cu thluachuah hawikom kan si ti nak a si. Hawikom ttha cu herhbau caan ah a kan um pi tu an si bangin Jesuh Khrih hawikom kan si ah cun Jesuh Khrih thluachauh nih a kan um pi zungzal ko lai.

A dongh tiang zumh fek tein kan um khawh nak hnga ding caah Jesuh Khrih he kan i pehtlaihnak hi hrawh lo hrimhim ding a si. Jesuh Khrih nih: “Keimah loin nan tuah khawh mi zeihmanh a um lo” tiah a ti mi kha philh lo ding a si(Jn 15).

Cuasicaah mithiang Paul zong nih: “Amah nih cun a dongh tiangin fek tein an umter hna lai i kan Bawipa Jesuh Khrih Ni ah cun ahohmanh nih sual an in phaw kho hna lai lo” tiah a ti (1Cor 1:8).