Duhnak nganbik

“Nan nu le nan pa, na u nan nau, nan sahlawh nan rualchan, nan hawi nan kom hna nih khan an in rawi hna lai i nannih lak i a cheukhat cu thahnak nan ing lai. Keimah ruangah mi kip nih an in huat hna lai. Sihmanhsehlaw nan lu cung samfa fa khat hmanh a tlau lai lo. Fek tein dir ko u, zeicahtiah hitihin pei nan nunnak cu nan khamh lai cu” tiah a ti(Lk 21:16-19)

Jesuh Khrih nih thihnak in a thawh tthan hnu le sunparnak he a rak tthan hlaan karlak ah a hnu zultu a simi Khrihfa mi hna nih an ton hnga ding mi harsat temhinnak hna he pehtlai in Luke 21:12-19 chungah fiang tein a kan chimh. Minung kan nunnak ah lunglawmhnak caan a um bangin ngaihchiatnak caan hna zong an um, sunghtlaknak caan a um bangin teinak caan zong a um.

Khrihfa mi hna caah cun ngaihchiatnak le sunghtlak nak hna um hmanh hna sehlaw, ruahchannak fek hi kan  ngeih zungzal ding a si. Zeicah tiah cun kan i ruahchanmi cu hi vawlei pennak siloin vancung pennak a si caah a si.

Bupi nifatin mithiang hna kong he pehtlai in puai a kan tuah piak. Mithiang hna cu kanmah bangin in a rak nung mi an si ve ko nain Pathian duhnak kha an duhnak nganbik ah a chia kho zungzal mi hna an si. Nihin ni ca zongah Bupi nih Vietnam ram in mithaing hna Andrew Dung-Lac le a hawi le hna puai a kan tuah piak. Annih cu thawngtha bia le Pathian pennak caah thisen luanh in nunnak a rak pe mi hna an si. Anih hna cu mithiang Paul bangin: “Nunnak hi ka caah zeidah a si? Kei ka caah cun nunnak cu Khrih a si ko. Cucaah thihnak nih hin a tha deuh chinchinmi thil hmanh a chuahpi lai” (Phil1:21) tiah a timi hna an si.

Ruahnak tha lo le thil tha lo tuah dingin kan lung chungin a hung chuah a si ahcun, Jesuh Khrih kha ruat tthan hna u sih. Mithiang mi hna nunzia le an rak zulh mi lam hna kha ruat tthan hna u sih. Zeizong vialte kha thlarau mit in kan zoh thiam hna an si ah cun Pathian duhnak kha kan duhnak nganbik ah a chia kho tu kan si ko lai.