Epiphany Puai

January

EPIPHANCY PUAI

            Epiphany timi cu Greek holh ah “Langhter” timi sullam a ngei. Mifim pathum puai timi Epiphany puai kha hlunghlai ngai in kan tuahnak thawngin mifim pathum hmang in minung vialte aiawhtu, Bawipa Jesuh nih a langhternak kha a kan cinken ter. Mifim pahthum tiah mi tampi nih theih mi mifim hna cu Jesuh Khrih biak awkah nichuah lei in Jerusalem khua ah an rak ra. “Atu ah hrin mi Judah Siangpahrang cu khuazei ah dah a um. Arfi kha nichuah lei ram ah kan rakhmuh caah amah biak le hmuh dingah kan rak ra” tiah an hal hna.  Cu bia cu Herod Siangpahrang nih a theih tikah a thin a phang i Tlangbawingan hna le Bible thiam hna kha a pumh hna hnu ah “Bawipa Jesuh hi khuazei ahdah a chuak hnga? tiah a hal hna. Cu hna nih cun, Profet pakhat nih a `tial mi ningin cun, “Maw … (Jerusalem) Judah ram, ka mibu Israel uktu Bawinu nannih chungin a chuak te lai,” tiah Herod cu an ti. Cu tikah Herod nih cun mifim pathum hna cu Bethlehem ah a thlah hna i “Va kal u law ngakchia cu va kawl uh, nan hmuh ahcun rak ka chim `than te u! keizong ka biak ve lai” tiah a cah hna. Cu mifim hna cu an chuak`han i arfi an hmuh `than caah an i lawm ngai. Arfi cu an hmai in a kal caah ngakchia umnak zawn a phak tikah arfi cu a dir. Innchung an vun luh tikah Nu Mary le naute kha an hmuh cangka an bawk i an biak hnu ah Sui, Hlawban le Mura an timi mansung thilri hna in an biak. Herod Siangpahrang sin kir ti lo dingin zanmang ah an hmuh caah lam dangin an ram leiah an kir `han.

            Mifim pathum hna nih an va biak lainak kong kha profet Isaiah nih Isaiah 60:6 chungah, “Kalauk bu nganngan cu Midian le Efah in an ra lai. Sheba in an ra lai i Sui le Zihmui kha an rak phorh hna lai. Pathian nih a tuahmi thil kong thawng`tha kha mi nih lunglawm tein an thang`that te lai,” tiah a rak chimchung cang. Bible hlun profet chimchung bangin cu mifim pathum hna kha mi fim bawi pathum tiah sullam a phuan (Ps. 72:10-11) Cun (Nam. 24:25) chung zongah arfi kong kha Balaam nih a thanh ve nak kan hmuh. Hlan lio tuanbia ningin mifim pahthum hna an min cu (1) Gaspa (2) Melkou (3) Beltasa an si tiah kan theih. An rak putmi laksawng hna zong sullam pakhat cio an ngei dih ve. (1) Sui cu Jesuh Khrih Siangpahrang a sinak kha a langhter. (2) Thlacamnak sullam a ngeimi Hlawban cu Jesuh Pathian sinak kha a si. (3) Mithi hna thuhmi Mura cu Jesuh cu mi vialte khamh awkah a thi te lai timi kha a langhter.

Add new comment

2 + 0 =