Hawidang he I Tahchunh Hlah

“Keimah tangka cu keimah nih ka duhduh in hman awk a si ko lo maw? Zeicahdah mi ka zaangfah hna hi nan hnah a chuah.” (Matt 20:15)

Nihin cathiang  (Matt 20:1-16) chungah mitsur dum ngeitu pa nih rian a ngei lomi hna kha a dum chungah rianṭuan dingin a fial hna nak kong kan hmuh. A cheu cu zingkate ah a kal ter hna; a chue cu suimilam pakua tluk ah a kal ter hna; cun chun suimilam hleihnih le zanlei suimilam pathum ah a tuah ṭhan. Cun suimilam panga a si deng mang cang zongah khan a hmuh mi hna kha a dum ahcun rianṭuan awk ah a kal ter ṭhiamthiam rih ko hna. Dum ngeitu pa nih rianṭuan tu hna he khan an hmuh hnga dingmi nihlawh man zong kha hnatlak nak a rak tuah cia cang fawn. 

Zanlei a hung si tikah dum ngeitu nih cun a dum uktu kha a kawh i, ‘Rian ṭuantu kha au hna law an ṭuan man kha pe cio hna, hmanung bikin fialmi kha ahmasa bik ah pe hna law hmasa bik i fial mi kha hmanung bik ah pe hna,’ tiah a ti. Rianṭuan tu hna nih cun an dih lak in ngun tangka phar khat cio cu an hmuh tak ko hna. Sihmanhsehlaw hmasa bik rian a lut mi hna nih khan hnu ah a hung lut mi hna cungah khan hnahchuahnak lungput an hung ngei. Cupinah dum ngeitu pa cung zongah an zai fawn. Cutikah dum ngeitu pa nih, “Ka kawi, kan hleng hna lo. Hawi hmuh cio tawnmi ngun tangka phar khat hmu dingin pei nan hna a tlak ve ko kha. Cucaah nan tangka cu i lak u law inn ah va ṭin ko u. A hmanung bik i ka fialmi hna nanmah zat pek ve cu keimah nawl pei a si ko cu. Keimah tangka cu keimah nih ka duhduh in hman awk a si ko lo maw? Zeicahdah mi ka zaangfah hna hi nan hnah a chuah,” tiah a ti hna.

Rianṭuan tu hna hi pakhat le pakhat cungah nahchuahnak lungthin an ngeih hlei ah a herh lo ah an zai fawn. Kan nih hna nih teh kan hawi dang pakhat khat nih kan ruah lomi thil an tuah khawh mi cungah siseh, khua-awn an ton nak cungah siseh, hnahchuahnak lungthin kan ngei ve tawn hna maw? Midang cungah hnahchuahnak kan ngeih mi le faksaknak kan ngeihmi nih a zei lei hmanh in an cungah fahnak zong a pe kho fawn hna lai lo. Midang cungah hnahchuahnak ngeih cu mah le mah cung tu ah fahnak i pek a si kha theih ding a si. Cun mah le mah duhsah tein i thah zong a si fawn. Mah le mah midang he kan i tahchuah a si ahcun “kei cu amah nak in kan sang deuh, ka thiam deuh, ka ṭha deuh, tbk,… asiloah ka niam deuh, ka thiam lo deuh, ka tlam a tling lo, tbk,…” mah le mah lung zornak i pek kha a si. Mah bantuk ruahnak nih hin midang si hna seh, mah le mah cungah siseh rawhralnak tu kha a chuahter tawn. 

Pathian pakhat lawng hi a dik, a hmaan ning in bia a kan ceihtu ding a si. Midang cungah biakhiahnak nawl zong kan ngei hna lo. Sihmanhsehlaw kan lung chung tein bia kan ceih lengmang tawn hna. Pathian nih pakhat cio kan nunnak ah a veel-thluachuah tampi a kan pek cio ko. 

Nihin ni ah hin Bawipa nih a kan pekmi veel-laksawng thluachuah hna cungah lawmhnak bia chim hna u sih. Midang cung zongah hnahchuahnak ngei hna hlah u sih. Midang hna he zong i tahchunh hna hlah u sih. Cutin kan nun kan um a si ahcun kan ngan zong a dam lai i a nuamh zong kan i nuam kho deuh lai. Midang hna caah thluachuah a phurtu zong kan si kho hna lai.