Hmelchunhnak

Nihin kan theih mi voi(1)nak Cathiang ah Bawipa Pathian nih Jonah sin ah: "Nineveh khualipi ah cun va kal law kan chimhmi bia cu va thanh tuah hna" tiin thawngtha chim ding le ralrin nak pek ding in rian a fial nak kong kan hmuh. Avoi(1)nak rian fial a si lio ah Jonah nih Nineveh khua mi kha a tih hna caah kal lo in amah duhnak lam ah a kal tik ah harsatnak tampi a rak ton. Kan nih pakhat cio hna zong Pathian duh mi tuah lo le zulh lo in kan mah pumpak duh mi rian lawng kan tuan kan tuah a si ah cun Jonah bangin harsatnak nih a kan hngah ko lai. Pathian nih a fial bangin Jonah nih a tuah tikah mi tong tampi khamh an si nak zong kan hmuh. Minung pakhat thawngin mi tong tampi khamh an si khawh nak raut ti hna u sih. Nang le keimah thawng in midang tampi khamhnak an hmu kho ve ti hi thei zungzal hna u sih. Pawngkam um mi kan hawi le hna lam an pial sual ah cun lam hmaan, Pathian duh ning in an nun khawh than nak hnga rian kan ngei cio.

Jonah nak in a lianngan deuh mi Jesuh Khrih hrimhrim nih thawngtha a chimh lio hna zongah Bawipa chim mi zumh duh lo in hmelchunhnak a rak hal mi Farasi mi hna zong an rak um. Bawipa nih hmelchunhnak a tuah piak hna maw? Tuah piak hlah. An zumh duh lo nak cung tu ah khan a sik hna. Minung nih hin Pathian hi kan sinum maw asiloah kan sal ah maw kan rel tawn hnga. Kan duh mi lawng kan tuah piak dingin thlacam kan hmang tawn. Pathian duhnak le a kan tinh piak mi zeidah a si ti hi kan ruat setsai bal hna lo. Thla kan cam cu Pathian he bia kan i ruah a si i kan mah lei in kan duh mi kan chim kan hal bantukin Pathian duh nak le a kan chimh mi kha ngaih kan hau ve. Mah duhnak lawng kan chim kan tuah a si ah cun kan palh sual lai. Pathian cu a kan ser tu le a kan uk tu a si caah kan herh mi le kan caah a tha ding mi vialte cu a theih cia dih ko. Lungsau tein kan hngah beltu cu a hau ve. Bawipa thlacamnak kan cam tik zongah kan hmuh mi cu: "Na duh nak bangin tuah si ko seh"(Matt 6:10) ti in a kan cawnpiak. Pathian duhnak kan cungah a tlin ah cun zeizong vialte cu a tling ko. Zei dang kan herh mi a um ti lo. A duhnak cu nikhat Amah he zungzal nun nuamhnak vancung ram phak ding a si.

Nangmah le kei mah thawngin midang tampi khamh an si kho ve ti mi hi philh hna hlah u sih. Kan hmelchunhnak a lian bik mi cu Bawipa Jesuh a si i a pahnihnak ah kan mah pakhat cio hi kan si. Pathian rian thiang ah i tel zungzal hna u sih.