Hmelchunhnak nganbik Jesuh  

Mi nih Jesuh kha an zual lulh ko lioah khan a thawh hna i, “Tuchan mi hi miṭhalo an va si hringhran dah. Pathian hnatlaknak a si ti hngalhnak caah khuaruahhar kan hmuhsak tuah, an ti, sihmanhsehlaw Jonah khuaruahharnak kha dah ti lo cu zeihmanh hmelchuhnak pek an si lai lo. Profet Jonah cu Nineveh khuami hna caah hmelchunhnak a rak si bantuk khan Mi Fapa zong hi tuchan mi hna caah hin hmelchunhnak a si ve lai.” (Lk 11:29-30)

Kan nih hna zong nih a caan caan ah cun Pathian sinin khuaruahharnak kan hal cio ve men lai dah tiah ka ruah. Abikin tu lio kan Kawlram chungah mikip nih ton cio mi harsat, ngaihchiat nak chungin kan luat khawh nak hnga ding caah tiin khuaruahharnak Pathian sin in kan hal bal cio men lai. Jesuh nih “Mi Fapa hi tuchan mi hna caah hin hmelchunhnak a si ve lai,” tiah a kan ti bangin Jesuh Khrih, amah sin lawngah kan duh mi vialte i ruahchan hna u sih. Jesuh cu kan caah hmelchunhnak nganbik le Khuaruahharnak  nganbik a si ko. 

Jesuh hrimhrim nih “amah cu kan caah hmelchunhnak nganbik ka si” tiah a kan ti bangin Jesuh Khrih lawnglawng kha hmuh khawh dingin biatak zumhnak he kawl zungzal hna u sih. Hmuh kan duh bikmi khuaruahhar thil cu Amah hrimhrim nih a kan hmuhsak ko lai.