Hmuh thiamnak

Nihin thawngtha bia (Mark 10:46-52)kan theih mi chungah mitcaw pa nih Jesuh sinah damnak, khuahmuh khawh tthannak a hal. Jesuh nih a zumhnak a hmuh tikah damnak a pek. “ Va kal kun, na zumhnak nih an damter cang” tiah a ti. Chikkhatte ah khin khua cu a hun hmu i lam ah cun Jesuh cu a zulh(Mk 10:52).

Mitampi nih Jesuh hnu an zulh lio ah lam pawng ah a thu i thil a hal mi mitcaw pa nih Jesuh sinah zumhnak in thla a cam tikah taksa damnak lawng siloin thlarau damnak tiangin pek a si. Mitcaw pa nih amah he then loin aa chiah peng mi cu, phaisa halnak kheng(cawk) le thiangthunh a si. Jesuh nih a auh tikah a ngeih mi vialte a chiah ta dih i Jesuh sinah a panh. A ngeih mi vialte chiah ta dih hnu a hmuh tthan mi laksawng cu taksa le thlarau damnak a si. . “A puan kha a hlonh duak i a pet i Jesuh sinah cun a ra”(Mk 10:50). Aa rak i thuamnak “puan a hlonh duak i” tiah a ti bang in kan nih hna zong Pathian sin kan panh cang lai kan ti a si ah cun kan i nunpi mi taksa duhnak kha chiah tak in Pathian duhnak kha panh cio, zulh cio ding a si. A dam hnu ah lunglawm tein Jesuh kha a zulh ve.

Jesuh nih mitcaw pa a auhter hna tik ah minung kha a hman hna: “Na thanuam ko, tho, an kawh cuh”(Mk 10:49) tiah an ti. Pathian sin thla kan cam mi a kan leh ning cang hna zong hi ruat cio hna u sih. Minung maw a hman hna, sermi thil dang dah a hman hna? Pakhat khat cu a hman hna i a sin phanh khawh dingah a kan auh cio ko. A hman mi hna kha hmuh thiam kan hau. Kan hmuh thiam hna lo a si cun taksa lei in khua cu kan hmu kho ko men lai, sihmanhsehaw thlarau lei in mitcaw kan si ko lai.

Pathian sermi thil hna hi a zoh kan thiam, kan hmuh thiam hna a si ah cun Pathian sin a kan phanhter kho tu ding lawng te an si ko. Hmuh thiamnak mit ngeih tu kan herh.