Hmuhnak

“Zeidah ka tuahpiak seh ti na ka duh?” tiah a hal. “Bawipa, khua hmuh ṭhan ka duh,” tiah a leh. (Lk 18:41)

Nihin ni caah Bupi nih ruah ṭi dingin le thazang lak ṭi dingin a kan thimpiak mi cathiang cu Luke 18:35-43 a si i Jesuh nih mitcaw pa a damternak kong a si. Hi mitcawpa sining hi kan zoh tik ah, midang pakhat khat sin in thil pakhat khat ka hmuh ṭheo lai timi ruahchannak he lam pawngah ṭhut in mi kip sinah thil a hal mi a si. Cun hi pa hi ‘Ruahchannak he a nung mi pa zong a si.’ Chun ni ceu ah kan um kan kal ve ko men lai, sihmanhsehlaw hi mitcawpa bangin muihnak chungah a um mi kan si maw? Kanmah tein thil kan ti khawh lo mi cungah bawmhnak pakhat khat hmuh dingin a hna a tung peng mi kan si ve maw? Mitcawpa cu Nazareth khuami Jesuh a pawng a kal a theih tikah khulrang in bawmhnak a hal mi a si. Kannih hna teh lungdong lo tein Jesuh sinah bawmhnak a hal zungzal mi kan si ve hna maw?

Mitcawpa cu dai tein um dingin pawngkam a um mi hna nih an rak thloh len ko. Sihmanhsehlaw a herh tuk mi thil le a duh tuk hringhran mi damnak hmuh ding caah cun a dai kho hrimhrim lo. Jesuh nih a theih khawh ding tiangin thang chinchin in a au ko. Jesuh sin in damnak a hmuh ṭhannak hnga ding caah a ning a zak lo. Bawipa zong aa bochan bangin aa bochanmi Jesuh sin zongin bawmhnak hal dingah a ning a zak kho lo. Kan nih hna teh zumhnak aa dang mi (other religion) hna sin kan phanh tikah Khrihfa kan si mi cungah hin kan ning a zak tawn maw? Asiloah mi hmai ah dir in thlacam dingin an kan fial tikah kan ning a zak maw? Catholic Khrihfa pakhat si ruangah kan ning a zak sual maw? Mi hmai ah Thumkomh Pathian hmelchunhnak tuah (sign of the cross) ding teh kan ning a zak sual maw?

“Bawipa, khua hmuh ṭhan ka duh,” tiah mitcawpa nih Jesuh sinah a hal. Nifatin kan nunnak ah hin kan hmuh khawh lomi thil tampi an um. Thildik-thilhmaan kan hmuh lo kan theih lo ruangah palhnak lam a zulmi tampi kan um. Mitcawpa nih Bawipa sinah “Hmuh ṭhan ka duh,” tiah a ti bangin kan nih hna zong nifatin kan nunnak ah a chia- a ṭha thleidan thiamnak, a palhmi thil le a hmaanmi thil fiang tein hmuh/ thleidan thiamnak veel thluachauh Bawipa sinah kan hal zungzal ding a si.