Hmun thiang

“Thlarau tthalo pakhat kha minung chungin a chuah tikah dinhnak hmun kawl awkah ram rocan chungah khan a kenkip ah aa chawk. A hmuh khawh lo caah khan aa thawh i, ‘Ka chuahtak mi inn ah khan ka kir tthan lai,’ a ti. Cacaah a va kir i inn cu thiangte le tlahirhiar tein a rak um ko kha a va hmuh. Cun a va chuak i amah nakin a chia chinchinmi thlarau pasarih kha aa ratpi hna i cuka ah cun aa umpi hna. Cucaah a donghnak ah cun kha mipa kha a hramthawk i a sining nak khan a umtuning a chia deuh,” a ti.(Lk 11: 24-26)

Pathian duh ning in kan nun khawh lo a si ah cun Thlarau lei in kan thurhnomh a si i Satan caah cun nuamnak hmun le um duhnak hmun ah a cang. Kan inn le kan lo hna ah Pathian hmanthlak thiang le zuk thiang hna kan chiah, ti thiang tibantuk kan i chiah mi hna hi Satan caah cun a um khawh lo nak hmun le a um duh lo nak hmun a si caah a thurhnawm mi hmun a si.

Kan sualnak hna kan i ngaihchih hnu, Pathian he rem tthannak kan tuah hnu ah mah duh in tlon, kan um tthan, Pathian cawnpiak nak hna kha zulh ti loin kan um tthan a si ah cun thlarau lei in a thurhnawm mi hmun a si tthan caah, Satan caah cun um duhnak hmun ah aa cang tthan.

“Amah nakin a chia chinchinmi thlarau pasarih kha aa ratpi hna i cuka ah cun aa umpi hna” tiah a timi hi kan zoh tthan a si ah cun, “pasarih-7” timi cu a tling mi timi sullam a ngeih caah, Pathian he i tthen, a nawl zulh duh lo, mah duh paoh in sual nak tuah a si ah cun Satan nih tling cikcek in a um hnawh i Satan nih amah ta ah aa ser; cu bantuk hmun cu Satan caah cun um duhnak hmun thiang ah aa cang timi hi theih ding a si.

Mithiang Paul nih: “Pathian biakinn nan si kha nan hngalh i Pathian Thlarau nan chung i a um zong kha nan hngalh. Cucaah ahohmanh nih Pathian biakinn cu a hrawh ahcun, amah cu Pathian nih a hrawh ve lai. Zeicahtiah Pathian biakinn cu a thiangmi a si i nanmah hrimhrim cu biakinn cu nan si”(1Cor 3:16-17) tiah a ti.

Thlarau thianghlim um duhnak hmun thiang kan si khawh cio nak hnga Pathian nih a thluachuah he kan umpi zungzal ko seh. Amen