HNANGAMNAK KAN HMUH LAI

Nifatin kan ttuan kawlnak chungah na lungre a thei sual maw? Asiloah na lung a der i lungawttawm in na um maw? Na thin phang rih hlah, hnangamnak le nunnak thar a kan pe kho tu, ruahchannak thar a um rih ti thawng kan theih ter ve lai.
Mikip nih lungdam tein um, hnangam ngai in ttuan le eidin kan duh cio. Cutin nun khawhnak caah hnangamnak kan kawl cio. A hman mi a si ko. Mikip nih kan zulh awk a si. Hnangamnak a duh lo mi, a kawl lo mi le a hrawk tu cu pakhat khat kan chambau cang kan ti khawh.
Hnangamter kho tu chungin a cheubang kan chim ahcun;
Kan zuamnak thawngin camepuai kan awn tikah, thlaicii cinthlak a chuakmi a tam tikah, leiba kan cham khawh tikah, lungrethei kan um lio ah bawmtu kan ton tikah, thihnak in kan luat tik caan zongah, kan hna a ngam i ka ni nuam ko hnga.
Mi hmai khah lo tiang in thil kan ton tikah hnangam tertu ruahchannak lam a hmu lo mi kan tam ko hnga. Fimnak ngeilo, ngandam lo le kan thazaang a der tikah, kan lung si a fak i harnak a tongmi zong kan tampi ko lai.
Hi bantuk harnak a tong i a hna a ngam kho lo mi kan unau, kan hawi le pawl hna kha bawmh kan herh ko. Mah hna kan bomh hna ruangah mah innchungkhar ah hnangamnak le lunglawmhnak kan phakter khawh a si ahcun bawmmi hna le, a bawmtu hna an pahnih in lung lawm hnangamnak an hmu hrimhrim lai.
Kan Bawipa Jesuh Khrih nih Judah ram kulh chung i thawngttha a chim lio ah khan an phunglam a buar tertu minu pakhat lung in thi lak cheh i thah an timh mi nu kha, thihnak in a khamh i sualnak in a tlanh hnu ah nunnak thar a pek lio ah le, a thi i thlan chung ah nili tiang a um cang mi Lazaru kha thihnak in a thawhter tthan tikah siseh, a rualchan cingla pawl kha lunglawmh hnangamnak a pek hna.
Zungzal a nungmi kan Bawi pa Jesuh Khrih cu a hlan lio in hnangamnak a pek hna bantuk in, nihin zong a sin a ra mi poah hnangamnak a pek hna. Mah kan Bawipa Khrih kha na tlaihchan i na nun a si ahcun nangmah lawng si lo in na innchungkhar, innpa chakthlang vialte zong nunnuamh hnangamnak nan hmuh hrimhrim lai. Bible cathiang nih a kan chimh mi cu “Nannih thilrit mi le rethei thaba mi hna, ka sinah ra tuah uh, dinhnak kan pek hna lai,” tiah Jesuh Khrih nih a kan auhnak thawng fiang tein kan theih.
Jesuh Khrih nih kanmah le kan innchungkhar kan zapi a kan auh len ko. Asin fuk usihlaw, a seihnam cu i bei tuah uh sih. Hnangamnak cu kan hmuh taktak ko lai.

Catial tu/- Nobert Ca Ling