Hnemhnak le Bawmhnak a kan petu cu Jesuh a si.

Photo Credit

Nihin ni caah Bupi nih ruah tti ding le thazang i lak tti dingin a kan thimpiak mi Bible cathiang cu(Mark 6:45-52) "Thlitu le tilet kar lakah Jesuh ti cung a kal zultu hna nih an hmuh tikah an thin a phaannak kong"a si. Minung hna kan nunnak ah hin "Thli chia" tamtuk nih a kan hranh cio tawn ve hna. Cucu "thli chia" he aa lomi "ngaichiatnak, lung retheihnak, raldohnak le ralzamnak te hna, cun in khangh tonnak tibantuk tthat lonak" tampi hmunhma kip ah a mikip nih ton cio a hung si. Hi thlichia hna nih hin minung hna fahnak tampi a kan pek. 

Zultu hna harnak an ton mi Jesuh nih a hmuh tikah an sin ah a kal i a rak hnemh hna, a rak khamh hna. Cun ttih lo dingin thazang a pek hna. Kan nih Khrihfa mi hna zong kan nunnak ah harsatnak "thlichia" kan ton tikah kan mah lawngin kan um lo, Jesuh nih a kan um pi ko, Khamhawk le hnemhawk ah Jesuh kan sinah a ra zungzal ko timi hi thei cio hna u sih law zum cio hna u sih. Zeicah tiah cun: "Nan sinah a zungzal in, caan a dongh tiangin ka um lai"(Matt 28:20) tiah Jesuh nih bia a kan kamh caah a si.

Nang na nunnak ah zeibantuk harsat-ngaihchiat nak thlichia dah na ton bal ve? Caan tlawmpal i lak law ruat ve hmanh. Na ton balmi thlichia cu na nunnak ah sau a rau maw? Cu lio caan ah khan aho nih dah bawmhnak an pek? Ho dah an intuar pi tu a rak si? Jesuh ka sinah a um  tiah na rak cohlang kho maw? Asiloah ahohmanh nih bawmhnak an ka pe lo tiah na rak ruat bal maw?

Jesuh cu kan sinah a um zungzal ko. Sihmanhsehlaw kan sin a um ning hi kanmah hna nih kan theih thiam a hau. Midang nu/pa pakhat khat sin in thazang peknak bia zong a rak chim men lai. Hla na ngaihmi chung zong in an chawnh men ko lai. Kanmah lei zong in Jesuh kan hmuh thiam a herh, Jesuh aw kan theih thiam a herh.
 

Add new comment

1 + 7 =