Hrial Ding

“Farasi mi hna thilnu le Herod thilnu kha i ralring u” (Mk 8:15

Hi vawlei cung kan nun lio ah hin minung hna nih zeibantuk thil le sining hna khi dah kan kawl cio hna hnga? Mi tampi cu kan i ngeih cia mi Pathian thluachuah hna kha hmuh thiam loin thil dangdang cungah kan lung a um tawm i thil dawhdawh, sining dawhdawh kan i ngeih mi hna kha hmuh thiam loin kan caan kan dih ter theo tawn.

Hitin kan si zong hi duhfah hakkauhnak lungthin kan ngeih caah a si. Cubantuk lungthin nih cun kan mit a kan huh, kan lungthin a kan molhter caah thil sining tak le thil dik, thil hman hna kha a kan hmuhter kho tawn lo.

Nihin ni caah Bupi nih ruah ti dingin a kan thimpiak mi cathiang cu (Mark 8:14-21) a si i kan Bawipa Jesuh Khrih thil ti khawhnak le Biatak a sinak kha zultu hna nih an hmuh khawh lo nak, an i fian khawh lo nak kong a si.

Cucaah Jesuh nih, “Farasi mi hna thilnu le Herod thilnu kha i ralring u” (Mk 8:15)tiah a ti hna. Jesuh Khrih nih “thilnu” timi biafang hmangin tahchunhnak bia a chim duhmi cu “a si tak lomi, a hmaan lomi” timi kha a chim duhmi le a cawnpiak duhmi hna cu a si.

Thilnu nih changvut a karhter khawh, a puarter khawh bangin lungthin thalo a ngeimi hna nih bia an chim tikah porh deuh in bia an chim tawn. Kan pawngkam ah siseh, online chung le social media hmangin bia dik lo le bia vakvai a chuahtertu tampi an um. Zirnak lungthin a ngei mi hna chimmi bia kan i zumh sual a si ah cun palhnak lam kan panh sual lai.

Farasi mi hna le tlangbawi upa hna nih Pilat hmaiah “Hi pi nih hin kan mi hna a pingah a hruai hna kha kan tlaih, a thawh hna i Sizar Siangpahrang sinah ngunkhuai nan pe lai lo, a ti hna i, keimah hi siangpahrang Khrih cu ka si, a ti hna” (Luke 23:2) tiin bia dik lo an chim tikah Pathian Fapa Jesuh kha thihnak tiangin an phanhter khah.

Dawtmi u le nau hna bia diklo, hlennak bia “thilnu” kha ralring tein hrial khawh i zuam cio hna u sih.