Hrial ding mi hna

Miding mifel hna cu ton-chawnhbiak an nuam. Mi tthalo hna cu uico hmanh nih an boh hna. Lungthin a thiang mi hna cu ngakchia hmanh nih an ngamh hna i mi hrokhrol hna cu upa hmanh nih an ttih hna. Chungthu lengnal cu ahohmanh nih an duh hna lo.

Minung hna cu kum sau, caan sau kan um tti tik hna ah hin nun zia hi theih a si. Mittha cu um kal tti an nuam i mi zir hna cu hrial awk an si ti hi theih cio a si. Mi lungthin ttha cu a dongh tiang in a lungthin a ttha ko lai i mi hrokhrol cu caan tawi te lawng a nun zia aa thuh khawh lai.

Kan bupi nih nihin ni ah a kan thim piak mi cathiang (Matt 7:15-20) chung kan zoh tikah “theipar zoh in a kung sining theih a si” timi kong kan hmuh.

Rian ttuan tti tu siseh, hruaitu si hna seh, thil ning cang loin chimrel le langhter lengmang in thil hmaan thuh a hmang mi an um tawn. Hram thawh biachim caan ah cun a hmaan mi an lo ngai nain, caan sau hnu ah cun hlen a hmang mi, tuah sermi langhter a duh lo mi an um tawn. Hi bantuk in ruahnak a ngei mi hna hnu zulh ah cun palhnak lam lei tu ah a kan phanhter tu an si. Pumpak in ruahnak ttha lo ngeih sining tiang phanh a fawi i a donghnak ah cun midang cungah hlen a hmang mi sining tiang a kan phanhter khawh ve. Mit nih a hmuh khawh lo mi hmai huh aa bunh mi minung tampi kan pawngkam ah an um thiam. Hmuh thiam i zuam hna u sih. Hihi Bawipa nih ralrin cawnpiak mi zong a si i theih-hngalhthiam a herh mi zong a si.

Bawipa ni: “Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo”(Jn 15:5) tiah a ti.

Bawipa a upat mi le a ttihzah mi hna cu “Dingfel” tein a nung mi an si bangin “Dingfel” tein a nung i Pathian a ttihzah mi hna kha panh zungzal hna u sih. An mah hna he rianttuan tti khawh i zuam hna u sih. “Sungh ningzahnak chung khan ka khamh law ka ral cu ka cungah an di riamhter hna hlah” (Psalm 25:2).