I PEK NING

“Pathian nih a auhnak hna le laksawng a pekmi hna kongah a lung a let tthan bal lo. Zeicahtiah zeizong vialte hi amah nih a sermi an si i zeizong vialte hi amah thawngin a ummi an si, amah caah an si dih. Pathian cungah sunparnak cu zungzal in um ko seh!”(Rom 11:29;36).

Thil pakhat khat ka tuah piak hna ruangah kei zong thil an ka tuah piak ve lai, “ka tuah piak hna bangin ka tuah piak ve hna seh” timi ruah channak hi kan nunnak ah a um lengmang mi a si tawn. Cheukhat minung hna pakhat le pakhat an i pehtlaih nak zong thil i tuah piaknak cungah hin hram a bunh mi zong an um. Kan Lai phung kan zoh tik zongah kawi kan i tlai hna i cu kawi kan i tlaih mi hna cung zongah “chiat tthat” ton caan ah bawmchantu an si ding hi ruahchan cio a si.

Nifatin kan i kawmhmi hna le rian kan ttuan timi hna cung zongah kan hmurka in chim loin um hmanh u sih law pakhat le pakhat cungah i hmuh tthan dingmi ruahchannak kan ngei cio tawn. Sipuazi nun in minung hi kan nung tawn.

Sihmahsehlaw, Jesuh nih cun a hnu zultu a si mi paoh nih hmuh tthan ding ruahchannak lungthin ngeih loin i pek dingah a kan sawm. Jesuh nih a kan sawm i a kan cawnpiak mi hi minung ruah ning in siloin Pathian ruah ning, thlarau khamhnak kong a si. “Rawl danghnak na tuah tikah, misifak, kutzeng, kezeng le mitcaw kha va sawm hna law, annih nih an i cham khawh lai lo caah thluachuahnak na hmu lai. Mittha mi kha thihnak in an thawh tthan tikah Pathian nih an cham lai ” tiah a ti (Lk 14:13-14).

Mithiang Paul nih Filipi khua mi hna sin ca a kuat mi ah: “Pakhat le pakhat i entainak le mah pumpak thangtthat kawlnak kha nan lakah umter hlah u. Toidornak lungthin tu kha ngei cio u law midang nakin ka ttha deuh tiah zeitikhmanh ah vaa ruat hlah u”(Filipi 2:3) tiah kan hmuh.