I sumnak in Teinak

Pathian rian kan ṭuannak ah hin kanmah duhnak hi hmai ah chiah in ṭuan kan hmang tawn. Pathian caah tiin mah duh paoh in rianṭuan cu a hmaanmi a si lo. Kan i tinhmi hna cu an ṭha ngai ko lai. Kan lungchung in kan ruahmi hna zong an ṭha ngai ko lai. Sihmanhsehla kan i tinhmi vialte hna cu thlacamnak in kan thawk zungzal a herh. Zeicah tiah cun a thianghlimmi rian a si caah a si. A sullam cu Pathian sin ap hmasat zungzal a herh.

A caan caan ah apoi ngai tawnmi cu a biapi tuk hringhran mi le tuah ding hrimhrim a simi kha tuah loin a herh satsai lomi rian hna ah khan kan caan kan liamter tawn. Mah duhnak lawng tuah kha kan i sum kho tawn lo. Pathian min lak riangmang in mah duhnak lawng kan tuah tawnmi kha kan i thei tawn hna lo. Bupi rianṭuannak ah le timhtuahnak hna ah a (awngmin) a tlam a tlin tikah mah hi cu keimah hruainak le tuahsernak thawngin a tlamtlingmi a si tiin kan ruah tawn.

Cucu a palhmi ruahnak le dirhmun a si. Zeizong te hi Pathian thawngin an si dih. Teinak le khuaawng tonnak zong hi Pathian thawngin an si. Pathian thluachuah an si. 

Jesuh nih: “Biatak kan chimh hna: facang ci pakhat cu vawlei ah tuh a si i a thih ta lo ahcun pakhat lawng a si peng ko. A thih ta lawngah facang mu dang tampi a chuahter khawh. Ahopaoh, a nunnak a dawmi nih cun a nunnak cu a thlau lai: hi vawlei cung i a nunak a huami nih zungzal nunnak ah cun aa chiah lai,” tiah a ti. 

Hmasabik ah pumsa thihnak siloin, mah duhnak lawng zulh le nunzia hlun ṭhalo hna in kan thih hmasat a ding a si (Rom 6:1-4). Sihmanhsehlaw hmun tampi ah a ummi kan u le nau hna nih Pathian an zumh (Khrihfa an si) ruangah sifah harsatnak tampi ing in an nunnak tiang a pe mi hna zong tampi an um taktak ko. Hibantuk mi hna nih hin mah duhnak zulh loin Pathian duhnak a zulmi hna an si kha fiang tein an kan hmuhter khawh. Mah taksa duhnak i sum in Pathian duhnak kha hmai ah a chia kho mi hna an si. 

Jesuh Khrih zong nih minung vialte tlanh an sinak hnga caah mah duhnak kha hlawt in Pathian duhnak kha a rak zulh ko. Mah ruangah cun pei a nunnak tiangin a rak i pek cu. 

Mah duhnak kha hlawt “thither in” Pathian duhnak kha abiapi bik ah na chia kho cang maw? Pathian sinah na pek sian rih lomi zei dah an si? Cun zei ruangah dah a si?