I Thim Thiamnak

Herodias fanu nih a nu chim bangin Johan lu a hal, a tanter tik hna ah lunglawmhnak puai an tuah mi cu ngaihchiatnak le thinphannak, palhnak puai ah a hung cang. Zeiruangah dah tipil petu Johan hi mah tluk in huat a rak si hnga?

Herod nih hi thil a tuahnak cu Herodias kha a nua Filip nupi a si nain nupi ah aa thit caah a si. Tipil petu Johan nih khan, “Na nau nupi nangmah ca i thit cu a tha lo,” tiah a rak chimh lengmang i cucaah cun Herodias nih khan Johan cu a lung chung tein a uam ziar i thah a duh. Thil a palhmi theih ko buin Herodias zong nih hakkauhnak lungthin he Herod nupi si a duh caah a si.

Hi kan vawlei pi ah hin thil dik thil hmaan theih ko buin palhnak lam hramhram in a zulmi tampi an um. Chikhat cu an caah diriamnak a pek khawh ko men hna lai. Sihmanhsehlaw caan chikhat te chungah i ngaihchih nak le ngaihchiat a hung chuak colh kho tawn.

Zan khat ah damiah phu nih dawr pakhat an luh hnawh i dawr chungum thil vialte kha hrawkh lo fir loin a man kha a lettalam in an bunh dih ti a si. A thaizing dawr ngeitu pa nih a dawr cu a rak hun tawn ning kel te khan a rak hon. Thil cawtu pawl nih thil man fak pipi kha man fawi tein a man an bunh i an zuar an hmuh tikah zeirello in an um i mitampi nih an kal tak. Ruam kainak lungput a ngei mi hna le ka rum, thil man fak le thil tha lawng a hmang mi ka si tiah aa ruat mi hna nih thil man a fawi tein an benh mi thil kha an hmuh tikah, hi thil hi cu thil tha a si lai lo. Man fak pipi in an zuarmi hna lawng hi thil tha cu an si ko lai tiah an ruah i thil thalo pawl tu kha a man fakpi an pek i an cawk cio hna ti a si.

Minung kan nunnak ah hin thil tha, thil mansung hna kha zeirello in thil man ngeilo, caan sau a nguh lomi nuamhnak hnu lawng ah khan caan pek in palhnak lam a zulmi tampi an um.

Pa Pathian nih Jesuh Khrih thawngin khamhnak a kan pek cang. Pathian nih a sin phanh khawh nak ding caah caan tha caan suanglawi a kan pek. Sihmanhsehlaw Pathian nih a kan pek mi caan tha hna kha i theihter duh lo, a kan cawnpiak nak hna kha i theihter duh loin; Satan nih a hmun lomi thil in lemsuainak, lam pingpalo hna cungah khan a kan hnuh tikah aa zumh sualmi zong tampi an um.

Herod le a nupi Herodias nih thil mansung Johan cawnpiaknak, khamhnak lam zulh duh lo, i theihter duh loin palhnak lam an zulh tikah, Herod cuah ni puai an tuah mi cu ngaihchiatnak le i ngaihchihnak tu ah a hung cang.

Dawtmi u le nau hna zungzal a hmun mi thil mansung kha i thim thiam cio hna u sih. Pathian thawngthabia a kan cawnpiak tu hna cawnpiak nak hna kha tha tein ngai hna u sih law zulh khawh i zuam cio hna u sih. Pathian sinah panh cio hna u sih.