I titer tuk hi a ṭha lo

“Nawlbia nih biapi taktak a si a timi dinnak le mi zaangfahnak le zumhtlakmi sinak hna hi pei nan tuah awk a si cu.” (Matt 23:23)

Minung pakhat i leng lei in hmuh khawh mi sining khi maw a biapi deuh hnga chung lei sining tak khi dah? Zeitin na ruah? Jesuh Khrih caah cun minung pakhat i chunglei sining,ruah ning le lungthin sining hna hi an biapi deuh zungzal tawn ko. 

Inn le lo chawva tampi ngeih le lenglei i hmuh khawhmi muisam dawh nak hna hi chunglei lungthin le ruahnak an ṭhat lo an thian lo a si ahcun pakpalawng menmen an si ko. Dawtnak lungthin ngeih lo, midang cung zongah zaangfah thiamnak le ruah piak thiamnak ngeih lo, abikin Pathian ngeih lo ahcun zeihmanh san a tlaihnak a um lo. 

Hmuh khawhmi thilri hna hi cu chikhat ca lawng a nguhmi an si. Kan lungthin chungah Pathian kan i ngeih khawh a si ahcun zeizong vialte a ngeimi kan si ko. Dawtnak lungthin kan ngeih khawh zungzal a si ahcun pawngkam ummi hna he zong dai tein rualrem tein um ṭi khawh peng a si ko. 

Nihin kan theih kan relmi cathiang (Matt 23:23-26) chungah kan hmuhmi cu “Leng lei sining lawng biapi tuk in a chia mi Farasi mi hna Jesuh nih sual a phawt hna” nak kong a si. Lenglei in zoh tikah Pathian lei ah siseh, biaknak lei ah aa zuam ngai mi an lo ko nain Jesuh nih “Mitcaw” he a tahchunh ko hna. Midang mithmuh ah an i titer nak cungah Jesuh nih “ngaihchia nan va si dah” tiah a ti fawn hna. Pathian sunparnak caah i zuam loin mah sunparnak ca lawngah a nung mi le khua a khang mi hna cu ngaihchiat awt taktak an sinak kha Jesuh nih a langhter.

Dawtmi u le nau hna ‘'chungthu leng naal’' nunzia kha hrial hrimhrim hna u sih. Pathian kha kan nunnak pakhat nak ah chiah khawh i zuam zungzal hna u sih. I titer timi cu Jesuh, Pathian hrimhrim nih a duh lomi a si.