Jesuh cu ahodah a si?

Catholic bupi cawnpiak nak hna chungah hin “biathuk” timi hna hi tampi in an um. Cu biathuk hna cu minung thluak nih a ruah khawh lo mi hna le a theih khawh lo mi hna zong an si. Mah cawnpiak nak biathuk hna zong cu a si taktak mi le a um taktak mi an si fawn. Cu biathuk hna cu cohlaan khawhnak ding caah Thiang Thlarau Pathian ceunak pek nak thawng in cohlaan, pom le zumh khawh an si. Pa Pathian, Fapa Pathian le Thiang Thlarau Pathian timi hi “Thumkomh Pathian pakhat” an si tiin bupi nih a kan cawnpiak.

Nihin bupi nih a kan thim piak mi cathiang (Mark 12:35-37) chungah David nih Pathiankha “ka Bawipa” tiah a auh. Ka Bawipa tiah David siangpahrang nih a ti mi hi Pa Pathian kha a kawh nak zong a si kho. Pa Pathian le Fapa Pathian le Thiang Thlarau Pathian cu pakhat an si. Fapa Pathian cu kan Bawipa Jesuh Khrih hi a si.

A si ah cun kan Bawipa Jesuh Khrih cu David hrinsor a si tiah cawnpiak tu saya hna nih cawnpiak lengmang a si. Jesuh Khrih nih biakinn thiang chungah a cawnpiak lengmang hna lio caan ah hin phungbia cawnpiak tu saya hna nih a cawnpiak hna mi kha ttha tein an rak cohlang kho lo. Zeicah kan ti a si ah cun, phungbia cawnpiak tu hna nih hin kan theih kan hngalh dih cio mi a si ko timi lungput he ttha tein Bawipa cawnpiak nak hna kha a ngai duh lo i an lung an i puarter. Hi bantuk lungput nih hin thil dik le thil hmaan cohlaan khawh nak le hmuh khawhnak mit kha a phenh dih hna. Hi zong hi ruah awk a um ngai mi a si. Mifim hna nih an pom mi cu “thil ka thei dih kho lo timi hi kaa theih” ti a si.

Mithiang hlim hna cu thla an cam tik paoh, Pathian he pehtlaihnak an ngeih tik paoh ah hin khuaruahhar in an um zungzal hi an konglam kan rel kan ruah tik paoh ah hin kan hmuh khawh tawn. Pathian sin in langhnak an hmuh paoh ah an khuaruah a har zungzal. Mithiang hlim hna cu hawi dang minung hna kha an upat zungzal hna. Ttha tein an chawnh an biak tawn hna. Pathian sunpar lianh ngannak zong kha an conglawmh, an thangtthat zungzal. Zeicah kan ti a si ah cun Pathian tthat nak le dawtnak kha midang cungah an hmuh khawh caah a si. Mi sawhsawh pawl cu thil lianngan an hmuh zongah an zei a poi lo. An lung zong a suk hna lo i an khuaruah zong a har lo.

Biatak tein khua kan ruah a si ah cun kan pawngkam ah hin khuaruahhar thil tampi an um kha theih khawh le hmuh khawh a si. Pathian sermi thil hna hi kan zoh tthan hna a si ah cun pakhat le pakhat zeihmanh an i lo cikcek dih kho lo. Thingkung pakhat in a tlai mi thingthei hmah hi pum khat le pum khat an i lo dih cikcek lo. An i dannak te hi a um cio. Sihmanhsehlaw, zeirel lo in kan um sawhsawh ko a si ah cun sertu Pathian kha a zei lei hmanh in thangtthat nak lam a um kho lo. Mah duhnak a tlin khawh lo ruang lawng ah sertu Pathian tu kha sual puh le thangchiat in um men a si ko lai.

Nihin kan rel mi cathiang chung i phungbia cawnpiak tu hna hi ka theih, ka hngalh ko ti lungput in Jesuh cawnpiak nak hna kha zei ah an rel lo. An um sawh i zeirel lo in sual nak lam tu kha an kawl zungzal. Kan nih pakhat cio han zong hi teh phungbia cawnpiak tu saya hna bangin kan si ve sual maw? A parpavuan te kan theih mi ah hin kan lung a puam sual ve maw? Ruat cio hna u sih. Kan thih hlaan lo chung Bawipa cawnpiak nak hna hi tangdornak lungput he khuaruahhar ngai in ngai zungzal hna u sih. Ruat zungzal hna u sih.

Jesuh Khrih cu David hrinsor(fapa) a si timi cu prophet hna cawnpiak ning le cathiang chung cawnpiak ning in kan zoh a si ah cun a hman mi a si ko. Sihmanhsehlaw, David um hlan ser hram thok ka tein Fapa Pathian(Jesuh) cu a um cang mi a si. Jesuh Khrih nih a cawnpiak duh mi le a langhter duh mi cu “Keimah cu Pathian sinin a ra mi Pathian taktak ka si, Fapa Pathian ka si” timi hi a si. Cu ruangah cun pei David hrimhrim nih Thiang Thlarau Pathian ceunak pek nak thawng in, langhter nak pek nak thawng in Pathian kha “ka Bawipa” tiah a rak ti kha nak a si. Mah hihi Jesuh Khrih nih a rak cawnpiak duh hna nak kha a si.

Cu a si caah kan nun caan tawi te chungah hin kan theih lo mi hna thieh thiam duhnak, hngalh thiam duhnak, cohlaan thiamnak veel, thluachuah run kan pe hram ko tiah nifatin thla kan cam ding a si. minung pakhat ruahnak le cung te lawngah bia kan i el peng a si ah cun, Pathian sermi khuaruahhar thil biathuk hna kha kan hmu kho lai lo i kan cohlaang kho lai lo. Minung ruahnak le thluak cu Pathian sermi thil khuaruahhar biathuk kha a thei dih kho lo. Minung thluak le ruahnak nih a theih khawh lo mi thil cohlaan thiam cu Pathian thluachuah a si. Catholic bupi nih a cawnpiak mi “biathuk” hna kha theih khawh lo le pom khawh lo ruangah bupi a kal tak mi hna zong hi vawlei cungah hin tampi an um. Mithiang Thomas Aquinas nih Bawipa THI le SA kong he pehtlai in hla a ttial mi ah: “Pumsa nih a theih thiam lo mi zumhnak nih a kan hngalhter” tiah a rak ti. Cu hla cu Bawipa THI le SA biak caan paoh ah kan sak zungzal mi a si.

Bawipa nih “Hihi philh hlah u: nan sinah a zungzal in, caan dongh tiangin ka um lai”(Matt 28:20) tiah a ti bangin Catholic Khrihfa hna zong nih kan zumhnak chungah kan nunnak a dih tiangin kan hmuh khawh cio hna nak hnga Pathian sinah thla cam zungzal hna u sih.