Jesuh he kan kal ah cun teinak kan hmu ko lai

Photo Credit

Nihin ni caah Bupi ruah ti dingin le thazaang lak ti dingin a kan thimpiak mi cathiang cu (Jn 13:21-33;36-38) a si. Jesuh cu “lung sivang ngaingai in a um” tiah a ti. Zei ruangah kan ti a si ah cun a dawt tuk mi le a hawikom a si mi a zultu chungin pakhat nih a rawi lai caah a si. Cu tikah zultu hna cu pakhat le pakhat an i zoh ko hna i ahodah a si hnga tiin khua an ruat cio. Zultu hna zong nih an Bawipa le an Saya a si mi cu aho nih dah a rawi hnga tiin lunghrinh in an un cio.

Peter maw a si hnga, Andrew maw, Thomas maw, Judas dah tiin biahalnak an ngei cio. Jesuh nih a hawikom le a Zultu siding in a thimmi hna zong nih an dawt tuk mi an chungkhar si hna seh, an rian siseh chiah ta dih, kaltak dih in Jesuh hnu a zul mi an si. Zei ruangah dah hawidang bang zultu sawhsawh siloin a hawikom a simi hna kha Jesuh nih hitin a ti hna hnga?

Hawi dawt, nang teh na hawikom, na chungkhar, na riantuan ti hawi, na innpa nih an rawi bal ve maw? Pakhat le pakhat i rawi timi hi a fak tuk mi a si kan theih cio. Abikin kan dawt tuk mi hna le kan zumh tuk mi hna nih a kan rawi ah hin a fak khun. Zultu hna caah rawitu si ding cu a si kho hnga maw?

Sihmanhsehlaw Jesuh nih a chimmi bia cu a hmaan mi bia an si. Jesuh nih a hnu zultu hna chungin rawitu an um a theih tikah zeitluk in dah minung sining in a lung a fah hnga i a ngeih a chiat ve hnga. Sihmanhsehlaw Pa Pathian a sin a um zungzal caah hi thil vialte cu Jesuh nih a tei khawh ko hna. Ahramthok tein Pathian nih a timh cia mi a si caah Jesuh nih cun a tuar khawh ko hna. Pathian ka sinah a um timi nih zeizong vialte cungah teinak thazaang a pek than.

Kan nih hna zong kan dawtmi hna nih an kan rawi tikah zeitindah teinak thazaang kan i lak than cio tawn. Kan Bawipa le kan Pathian a simi Jesuh sin kan panh than lawngah teinak thazaang kan ngei kho hna lai. Zeibantuk thil kan ton zongah kan hlaan ah a rak ing-tuar bal cang mi Jesuh kha zoh than zungzal hna u sih. A kan thei dih tu le a kan daw zungzal tu Jesuh kan sin a um ah cun teinak kan hmu zungzal ko lai.

Add new comment

5 + 5 =