JESUH A INN DAWTNAK(1)

Kan Bawipa Jesuh Khrih cu kuangte chungah a um zungzal ko timi hi Mithiang hna nih an upat ngaingai mi thil pakhat a si. “Bawipa ta a si mi thil” (1Cor 7:32) ti in siaherh ngai le aa dawh ngai le a thiang ngai-in an tuah mi nih hin an dawtnak hi a ngan ngaingai ti kha a langhter i, a biapi ngaingai in an ruah i mah kong ah St. Theresa le Alphonse hna cu an nunnak hmanh pek an sian, an ti.

Thiannak le ttamhnak
Mithiang hna sinin kannih nih Bawi Jesuh kha a “Umnak hmun” (Mk 11:17) a si mi a kuang thiang, biakttheng le biakinn hna kha duhnak le dawtnak he zohkhenhnak in Jesuh kha dawt awk a si ti kha kan cawn. Zeizong te kha aa dawh in ttamh ding a si, zeizong vialte nih duhpatnak lungthin, biaknak lungthin kha a chuahter ding a si, a hmebik le a neknawite hmanh nih khan biaknak lungthin a chuahter ding a si. “Sunparnak Siangpahrang” (Ps 23:10) dawtnak le upatnak ahcun a tamtuk ti a um kho lai lo. Tahchunhnak ah hlan ahcun Missa chung i siangbawi kut ttawlnak ti hmanh khi zihmui tawih mi an hman.
Cu lawng a si lo, Jesuh nih Dawtnak Sacrament (Bawipa thisa) kha upat awk caah aa tlakmi le aa dawhmi inn kha a thim. Mah inn cu rawleinak inn khaan kaupi a si i tthutdan cabuai le kawzaw he `amh mi a si(Lk 22:12). Mithiang hna cu Pathian inn kha dawhte le thiang tein hmuh a si zungzalnak hnga lungthin tak in an i zuam i an ngeihchiah vialte kha an hman dih.
Tahchunhnak ah, Assisi khua mi Mithiang Francis cu Thawngttha phuan in khual a tlawn tikah a thurhnawm mi biakinn pawl phiahnak caah hmunphiah kha aa ken tawn. Mi zapi sin phung a chim hnu ah khua i a um mi siangbawi pawl kha Bawipa inn kha aa dawh tein a langhnak hnga caah fakpi in i zuam u tiah a fawrh tawn hna. St. Clare le a sister hna nih biakttheng ttamhnak caah khiangrang puan kha an timhtuah tawn. A sii a fah bu khan a sii a fak i zohkhenh lo mi biakinn hna caah Bawipa thisa chiahnak hrai, cha-lice hrai le biakttheng khuh puan hna kha a kawlpiak hna i a kuat hna.
St. John Baptist De La Salle cu biakinn kha thiang zungzal sehlaw biakttheng cu a ningcang tein um sehlaw meivang zungzal seh ti a duh. Thilthuam a tlek mi hna le um le kheng pawl a thur in a vun hmuhmi khi a caah lungkuainak ngai a rak si. Bawipa biaknak caah a herh ti a vun hmuh ahcun a man a har tuk ti a ruat bal lo.
St. Paul of the Cross cu biakttheng kha sawi awk um lo in thiang seh ti a duh. Nikhat ah Bawipa thisa danhmi puanrang te kha a thiangtuk lo in a hmuh hna caah pakhat hnu pakhat in a chiah tthan hna.

-------Kan peh tthan lai……..

Catial tu/- Fr. Paul Thla Kio