JESUH A INN DAWTNAK(2)

Bawipa thisa a daw mi siangpahrang hna lakah a lang khunmi pakhat cu Bohemia siangpahrang, St. Wences-lause a si. Anih cu amah kut tein lo kha a thlawh, changvut kha a tuh, a zun, a suk i a rilh. Cun a thiangbik mi changvut in Bawipa thisa raithawinak thiang caah changreu kha a ser. St. Radgundes, France siangpahrang nu cu aa toidor mi sister a vun si tikah Bawipa thisa changreu ca i thimmi changvut kha amah kut tein a rial khawh caah aa lawm ngaingai i mah changreu hna kha a sii a fak mi biakinn hna sinah man lo in a kuat hna. St. Vicentia Gerosa zong Missa Thiang caah hman mi misurhang caah misur kung kha ttha tein a zohkhenh hna. Amah tein misur kha a cin hna, a kut tein a saampiak hna i, an tlai hi Jesuh thi ah a cang lai ti in a vun ruah tikah aa lawm ngaingai.
Thluachuah Sacrament ah Bawi Jesuh a um taktak ti kha Mithiang hna nih cun lungawttawmnak ngeih lo in an zumh i an upatnak ah a lang. Mithiang Padre Pio cu Bawipa thisa kheng a vun thenh tikah zeibantuk biaknak in a tuah ti kha a hmai ah a lang.
Voikhat ah Mithiang Therese cu Missa a dih hnu ah kheng chungah Bawipa thisa chang a pelte a um kha a hmuh. Anih nih a sister hawi kha a auh hna i biaknak thinlung he procession in a khaan chungah an luhpi. St. Theresa Margaret nih Bawipa thisa a pelte pakhat kha zelttuang ah a hmuh tikah a mitthli a tla thluahmah, zeica tiah upat lo in an tuah sual lai ti kha a phang i, Bawipa thisa hmai ah siangbawipa a ra i kuangthiang chung a chiah hlantiang khukbil in a biak.
Voikhat ah St. Charles Borromeo cu Bawipa thisa kha a phawt lengmang hna lio ah changreu thiang cu a kut in a tla sual. Mithiang pa cu Jesuh cungah ka sualtuk cang tiah aa ruah i nili chung Missa a tuah ngam lo i, a sual dantatnak caah niriat chung rawl a ulh.
St. Francis Xavier cu a caancaan ah Bawipa thisa a pek lio hna ah a kut chung i a um mi Bawipa cungah upatnak lungthin he a khuk aa bil i a khukbil bu khan Bawipa thisa kha a pek ttheu hna. Vancung he aa tlakmi zumhnak le dawtnak tehte a langhter mi a si hnga lo maw?
Mithiang a si mi siangbawi hna nih Bawipa thisa changreu an tonghnak kong hi aa dawh ngaimi a si ve. Sualnak a ngei lo mi Nu Mary bang in a thiangmi kut kha ngeih an duh ve. St. Conrad of Constanza cu Bawi Jesuh Pum thiang a tonghnak a kutdong hna hi zumhnak le dawtnak in a vun hman hna caah a kutdong hna le a siapi hna hi zan ah an ceu tawn. St. Joseph of Copertino hi a thiang ngaingai mi a si i anih nih a duh bik mi cu Bawi Jesuh tongh ding ah kutdong le siapi dangte ngei ninglaw ti a rak duh. Bawi Jesuh hma a pu mi Padre Pio cu a kut hma ruangah Bawipa thisa maw thur sual lai tiah harngai in kutdong te lawng kha a hman tawn.
Bawi Jesuh cung zumhnak le Bawipa thisa cung zumhnak le dawtnak nih hi bantuk thil kha mithiang hna lakah a chuahter. Mithiang hna bangin Bawipa kha daw thiam ve u sih law!

Catial tu/- Fr. Paul Thla Kio