Jesuh kawhnak

Photo Credit

“Cuka hmun cun Jesuh cu a chuak i a kalpah ah khan ngunkhuai khawltu Matthai a zung i a rak ṭhut ko kha a hmuh. Amah cu, “Ka zul,” tiah a ti. Matthai cu a tho i a zulh.” (Matt 9:9)

Matthai cu ngunkhuai khawltu pakhat a si. Amah cu a miphun Israel mi hna nih an zohchuk tukmi le an huat ngaimi pakhat a si ko. Zeicah kan ti a si ahcun uktu Rome miphun hna caah rian a ṭuan lawng siloin a mah miphung Israel mi hna rawitu bantuk a si caah a si. Mikip nih nehsawh mi a si caah mah le mah zumhnak (confidence) a tlawm kho men mi zong a si. Cun amah lawng tein leng chuah zong a fawi men lai lo.  

Hi bantuk thil sining Matthai nih a ton cuahmah lio ah a min a thang cuahmah lio mi le a laar cuahmah lio mi, cun Saya tiah auh a simi Jesuh nih “Ka hnu ka zul” tiah a vun sawm tikah, Maṭhai nih zeitluk in dah aa lawmh hnga? Matthai zong nih lungawṭomhnak zeihmanh ngeih loin a tho i Jesuh hnu cu a zulh bak ve ko. 

Jesuh Khrih kan sin a rak ratnak sullam cu taksa lei in siseh, thlarau lei in siseh kan dam lo nak hna in thlop a kan duh caah a si. Damter ṭhan a kan duh caah a si. Ser hram thawk ka tein kan rak i ngeih chih mi “Huham”(dignity) kha pek ṭhan a kan duh caah a si. Matthai zong a pawngkam um a miphun hna ruangah a lungthin chungin dam lonak tampi a tuar kho mi zong a si. Sihmahsehlaw JESUH he an i ton hnu ah cun damnak a hmu ṭhanmi ZULTU a hung si ko.

Jesuh nih mi vialte hi a hnu zulh dingin a kan kawh cio mi kan si. Hlaan lio caan ah zohchia ngai in a rak nung mi si ko hna hmanh u sihlaw Jesuh caah cun zeihmanh a poi lo. A kan kawhnak le auhnak aw thawng tu kha ṭha tein theih i a hnu zulh ding tu kha a kan sawm cio mi a si ko. Abiapi mi cu a kan auhnak aw theih ding le leh ding tu kha a si ko. Leh ding le leh lo ding, Jesuh hnu zulh ding le zulh lo ding timi cu kan mah nawl a si ko. Zalong tein thimnak nawl a kan pek ko. 

Jesuh aw fiang tein kan thei kho cang hna maw? Kan lungthin chungah Jesuh kha hmunhma kan pe kho cang maw? Matthai bantukin Jesuh hnu a zul kho tu kan si khawh cio nak hnga ding caah Jesuh kha kan lungthin chungah hmunhma pe hna u sih. Kan zeizong vialte a kan thleng kho tu cu Jesuh lawng a si ko. Nunnak lam lei ah a kan hruai kho tu cu amah Jesuh kha a si ko. Nunnak lam zulh dingah a hak mi kan lungthin kha a nemter ṭhan ko lai. Jesuh aw kha ṭha tein ngaih in amah kha hmunhma pe cang hna u sih. 

 

Add new comment

2 + 1 =