JESUH KAWLNING LE ZULHNING 

Micheu nih, “Tipil petu Johan kha a nungṭhan” an ti, Midang nih Elizah kha a hunglang cang an ti i a dang nih hlanlio pi i a rak ummi profet pakhatkhat a hung nungṭhan, an ti. Herod nih khan hi bantukin thil a ummi vialte kha a theih ve tikah, hi kongah hin a lung aa tuai ngaingai.” Johan cu a lu ka tanter cang hna. A thawng ka theih lengmang mi pa hi a hodah a si kun?”, tiah ati. Cun Jesuh hmuh dingkha heh tiah aa zuam. (Lk 9:9) 

Herod nunzia hi phunhnih in kanmah nih kan i lak khawhmi a um. Nunziaṭha le Nunzia ṭhalo a si. A nunzia ṭhatlonak konglam cu mitampi nih theih cangmi a si. Sihmanhsehlaw, nihin ni i Herod sinin kan
i cawn dingmi nunziaṭha pakhat cu Jesuh hmuh a duhnak zawn (“Herod nih Jesuh hmuh ding kha heh tiah aa zuam lengmang” (Lk 9:9) a tinak zawn hi a si. Phundangin chim ahcun “a thianghlimmi hmuh duhnak”
kan ti lai. Herod nih Jesuh khrih cu mi sawhsawh a si lo, mah mipa hi zeibantuk a si hnga, tiah theih a duh; zeibantuk khuaruahhar khi dah a tuah hnga tiah hmuh a rak i zuam kha a si. Herod nihcun Jesuh Khrih cu athih hlanah a rak hmuh taktak ko nain, Jesuh a rak kawl ning a hmaanlo caah zeibantuk khuaruahhar thil hmanh a rak hmu kho lo. Kannih Khrihfa hna zong nih Herod nih Jesuh hmuhkhawh ding aa zuammi hi kan i cawn dingmi pakhat a si. 

Jesuh cu kan hmuh cang; amah sinin kan i cawn dingmi, Jesuh Khrih nih a kan duh piakmi hi zeidah a si; tihi ruat ve hmanh usih! 

Nikhatah Jesuh cu khualtlawn ah aa thawhṭhan i, culio ahcun mipa pakhat cu a sinah a hung tli i a hmai ah a khuk aa bil hnu ah, “Saya nangmah cu miṭha na si, zungzal nunnak hmuh awkah zeidah ka tuah lai,” tiah a hal. Jesuh nih cun, “Pakhat lawnglawng na bau; vakal law na ngeihmi thil vialte kha va zuar law na hmuhmi tangka cu sifakmi kha vaṭhen hna, cun Vancungah rothil na ngei lai; cun ra law rak ka zul; tiah ati. (Mark 10:17,21) 

Hi Bible cacaang hi kan zoh sicun, Mipa pakhat nih a nunnak caah biakhiahnak le tuah hnga dingmi i thim ding Jesuh Khrih nih a chimh tikah mipa nih cun a cohlang kho lo. “Cubia cu mipa nih khan a theih tikah a hmai a chia i ngaihchia ngaiin a kir.” (Mk 10:22) tiah kan hmuh. Mipa nih biahmaan hal awk a tlakmi kha a hal; sihmanhsehlaw, aa thimmi cu palhnak lam a rak si ai. 

Jesuh nih Pathian a ṭhatnak kong a chimh hmasa hnuah Pathian nawlbia zulh ding a herhnak kong zong a chimh ko. Cucu Pathian hmaiah aa tlak taktakmi sining le dirhmun in a um kho taktak mi a si maw, silo timi kha mipa sinah a hmuhsaknak zong a si. Kannih pakhat cio hna zong a thianghlim taktakmi le a ṭha dih cikcekmi ahohmanh kan um lo. Pathian hmaiah dengteomao (direct) in phanhkhawh ding aa tlakmi a hohmanh kan um lo. 

Nawlbia zulh le lenglei phunphai zulhnak ahcun minung sining zongin felfai ngaiin kan tuah, kan tlinh khawh men ko lai. Sihmanhsehlaw, dawtnak taktak in Jesuh kawl le a hnu zulh, (a kan duhpiakmi ningin tuah) kan timi ahhin, “kan hlawt i kan hrialhnga dingmi thil tampi aum timi zong kan theih ahau. Mithiang Paul nih, “Lenglei phunglam kaa bochan khawh a timi an um ahcun, cubantuk tikhawhnak cu tam deuh chinchin ka ngei, zarhkhat ka si tikah cuarpartan ka si, chuahkehnak leiin Israel mi Benjamin phun, Hebrew mithiang ka si. Judahmi nawlbia zulhnak leiah Farasi ka si i ka ṭan tuk leiah Khrihfa bu kha ka hrem. Nawlbia chung thil zulh ding a si tiah ahcun soi awk umlo ka si,” tiah ati. (Filipi 3:4-6) 

Jesuh nih mipa kha “ra law na ka zul” a ti bang khan kannih pakhat cio zong Jesuh nih a kan sawm ve. Cucu kan caah thawngṭha, kan kawl i kan hmuhmi Jesuh nih a kan duhpiakmi taktak cu a si. Kan ngeihmi vialte chiahtakin ahnu zulh kha a si. Ngeihmi thil kan ti tikah chawva lawng silo in ruamkai porhlawtnak lungthin, hakkauh mah zawnlawng i ruahnak, entai nahchuahnak, ziar ngeihnak lungthin zong an si kho. Jesuh nih, “Zulh a ka duhmi paoh cu mah zawn aa ruat lomi nan si lai, cun nan vailam nan i put lai i nan ka zulh lai, zeica’htiah a nunnak khamh a duhmi cu a nunnak kha a sung lai i keimah ruang le thawngṭha ruangah a nunnak a sungmi nih a nunnak kha a khamh lai. Mi pakhatkhat nih vawlei hi a ningpi in coseh law, a nunnak a sungh ṭung ahcun, zeital a miak hnga maw? Miak hlah,” tiah a ti. (Mk 8:34-36) 

Cucaah Jesuh ka kawlin ka hmuh cang aa timi le, Jesuh kha kawl, a kan duhpiakmi kha a theihfiang rih lomi nih, Pathian duhmi thil aa thim khotu le hmu khotu sikhawh i zuam zungzal hna usih. Hmuhthiamnak le i thim khawhnak thazaang thluachuah vanluh zong hal zungzal hna usih! 

/-Norbert Ca Ling (OSC)