Jesuh Khrih cu kan zawn a kan ruahpiak thiamtu a si

Jesuh nih a zultu kha a auh hna i, “Hi mi hna hi kan sinah ni thum an um cang i atu cu rawl ei awk an ngei ti lo i ka zaang an fak ngaingai. Rawl loin annih tlunter cu ka duh lo, lampi ah an va buhri sual lai,” tiah a ti.(Matt 15:32)
 

Kan Bawipa Jesuh Khrih nih a hnu in a zul i a cawnpiaknak a ngaitu vialte hna kha zeitikhmanh ah a philh bal hna lo. An zawn a ruah piak hna i “an herh takmi “a pek zungzal ko hna.

Nihin Bupi nih a kan thimpiak mi cathiang (Matt 15:29-37) chung kan zoh tik zongah Jesuh nih a hnu zulh in a cawnpiak mi thawngtha bia a ngai mi hna rawl a dangh hna nak kong kan hmuh. Jesuh Khrih nih kan thlarau ca lawngah siloin kan taksa ca zongah a herh mi tiangin a kan ruah piak thiam zungzal ko tihi kan theih ding a si. A hnu a zulmi hna caah an herhmi thil in a bawmh zungzal ko hna.

Zeizong vialte a tuah kho tu kan Pathian nih kan thlarau khamh a sinak ding ca lawngah a kan tinhpiak lawng siloin, eidin ding siseh, kan dawp mi thlizil thiang siseh . . . . kan taksa ca ah nifatin kan herhmi a kan pek zungzal ko. Thlarau ca lawngah siloin taksa caah kan herh mi hna hi zei ruangah dah a kan tuah piak/ pek hnga?

Jesuh Khrih thihnak in a thawhthan tikah taksa he thlarau he a tho than mi a si. Taksa a ngeih caah zultu hna nih an mit in an hmuh khawh i an kut in an tongh khawh. Cucu hmai lei caan ah kan si te hnga ding mi sining kha a kan hmuh sak mi a si. Kan nih hna zong taksa he thlarau he Jesuh Khrih bangin kan tho than te lai timi sining kha hngalher nak hnga ding caah a si.

Cuasicaah kan taksa caah kan herhmi a kan pek bangin kan mah hrimhrim zong nih kan taksa/pumsa hi thianghlim tein zohkhenh ding hi a herh ve. Zeicah tiah nikhat a tho than te hnga dingmi pumsa/taksa a si caah a si.

Mithiang Paul nih: “Nan pum cu Thiang Thlarau biakinn a si”(1Cor6:19) tiah a ti bangin Thiang Thlarau biakin a simi kan pumsa cu thianghlim tein chia zungzal hna u sih, zohkheh zungzal hna u sih. Bawipa nih kan herhmi vialte hna caah a kan ruahpiak thiammi cungah hin Pathian cungah lawmhnak bia zong chim zungzal hna u sih.