Jesuh Khrih nih a Khua mi hna a Philh hna lo

Bupi nih nihin ni caah a kan thim piakmi cathiang cu (Luke 4:14-22) a si i “kan Bawipa Jesuh Khrih nih a rak tthan nak khua Nazareth khua ah kal in thawngtha bia a phuannak kong a si”. Jesuh Khrih nih a rak tthannak khua mi hna kha a rak philh hna lo. A rak tlawn hna i thawngtha bia a rak chimh hna.

Tu chan ah Jesuh Khrih hi rak nung than sehlaw a mi hna, a khua mi hna a ttanh tuk hna tiah a timi zong kan um men lai. Cu lak ah Pathian kong he pehtlai in khamhnak thawngtha bia a phuan tikah tuchan ah cun si sehlaw pastor pakhat, siloah Siangbawi pakhat hmuh in hmuh a si lai i fak deuh in a kong zong ceih a si men lai.

Nang le kei teh Pathian rian thiang a ttuan mi hna a soisel tu kan si bal ve maw? A nih nu a nih pa cu an khua mi hna lawng, a miphun lawng a ttanh hna tiah a ti bal mi kan si ve maw?

Jesuh nih an khua a phak tikah: “Bawipa Thlarau cu ka cungah a um, Sifakmi hna sin i Thawngtha chim awkah chiti a ka thuh i luatnak thanh awkah a ka thlah. Mitcaw mi hna sin i khuahmuh thannak pek awk le Hremmi hna luatter dingah a ka thlah, Bawipa nih a mi hna a khamh hna lai ding kum cu va thanh awkah a ka thlah!”(Lk 4:18-19) timi cathiang kong kha a chimh hna.

Kan nih hna zong nifatin kan rel kan theih mi cathiang hna in Jesuh nih thawngtha bia phuan ve dingin a kan sawm zungzal ve. Nihin kan peng kan ram nih a ton cuahmah mi harsat nak hna chungin luatnak, daihnak le hnemhnak thawngtha bia mikip sinah phuan dingin Jesuh nih a kan sawm. Thlarau mitcaw mi hna zong nih Pathian khamhnak lam an hmuh tthan i “lam le biatak le nunnak” (Jn 14:6) a si mi Jesuh sin an panh khawh tthannak hnga ding caah Jesuh nih a kan sawm i rian fial kan si ve hna.

Tipil nak a ing cang mi kan nih Khrihfa mi vialte hna zong nih Jesuh cawnpiak mi thawngtha bia phuan dingin rian kan ngei cio hna i, kan si khawh ning cio kan thazang ngeih ning cio in phuan khawh i zuam cio hna u sih.