Jesuh Lungput Ngeih Kan Herh

Jesuh sinah khan mithinghmui pakhat kha a ra i a khuk aa bil i, “Na duh ahcun na ka thianter khawh” tiah bawmhnak kha a hal(Mark 1:40).

Hlaan Jesuh chan lio ah hin thinghmui zawtnak nih a tlunhmi hna hi thlop khawh mi zawtnak a rak si lo. Cu ruangah mithinghmui paoh kha mithi mi hna bangin khua leng ah rak chuah an rak si. Cu a silo ah, mithinghmui hna an hmuh hna ah cun a dam mi hna nih zawtnak chawnh an si lo nak hnga ding caah a langpar in rak hrial an rak si. Tu chan Covid-19 zawtnak a ngei mi hna ttih an si bang khin rak ttih mi an rak si.

Sihmanhsehlaw Jesuh nih cun thinghmui zawtnak kha ttih loin a sin ah bawmhnak a hal mi paoh kha a dam ter ko hna. Thinghmui zawtnak a ngei mi hna cu minung mi dam hna nih rak hlawtmi an rak si caah: “Jesuh nih cun a zaang a fak ngaingai i a hei banh i a hei tonh. Nangmah thianter kha ka duh”(Mark 1:41)tiah a ti ko. Zeicah kan ti a si ah cun Jesuh nih minung zawn a ruah ruangah a si.

Kan Bible cathiang chungah Jesuh ti loin aho nih dah thinghmui zawtnak a ngei mi hna kha a kut in a tongh hna i a damter kho tu nan hmuh bal cio hnga? Mithinghmui hna zong nih zeitlukin dah hi bantuk thleidan an si nak ah hin an lung a fah ve hnga?

Nihin kan vawlei pi ah aho khi dah chunglei in thinghmui zawtnak a ngei mi kan si ve hnga? Nang le kei nih teh hlaan lio bangin mi thleidannak kan ton ve a si ah cun kan celh ve cio hnga maw? Jesuh sinah kal in kan dam lonak thlop kan si ve nak hnga ding caah bawmhnak kan hal bal ve maw? A si lo ah lung rethei khuaruahhar vansang in a um mi hna nih bawmhnak a kan hal ah siseh, biaruah a kan duh ah siseh, Jesuh bangin bawmhnak kan pe ve bal cang hna maw?

Jesuh bangin a kan herhmi hna cungah kan kut samh khawh i zuam ve hna u sih.