JESUH MUIHMELTHLEN NAK

6^th August

JESUH MUIHMELTHLEN NAK

(TRANSFIGURATION)

            Bawipa Jesuh Khrih cu sifah temhinnak a in hlanah Peter, John le James kha a auh hna i Galilee ram i a um mi Tabaw tlang cungah thlacam awkah an kai. Zultu pathum a thim hna i a auh hnawh chan cu mihmai ah `tayaupadi ningin tette siter duh ah a si. Peter cu Bupi hruaitu sinak in anmah he an um. Chikhatte ah Bawipa Jesuh a hmai cu aa thleng i a angki zong cu a rang i a tleu in a tleu. Cuhnuah Moses le Elizah hna cu `thawnnak in an lang i Bawipa Jesuh he bia an i ruahnak ah a rauh hlanah Jerusalem khua ah a tlinghnga mi Exodus Bible chung bia hna kha ani ruah len. Moses cu `tayaupadi kha siseh, Elizah cu profet hna kha siseh, ai awh in Jesuh cu Biathiang hlun ah fiangtein a chim bantukin Messiah a sinak kong kha tehte langhternak a si. Anmah an chim mi Exodus Bible kong cu Bawipa Jesuh sifahtemhnak a innak le a thawh`thannak kong kha a sawh.

            Peter nih Jesuh kha “Bawipa hi hmun ah um awk a`tha. Bawipa caah thlam pakhat, Moses caah pakhat, Elizah caah pakhat, thlam pathum kha na hnatlak a si ahcun kan sak lai” tiah a ti (Mt; 17:4). Asinain amah nih zeidah a chim kha a hngal lo. Khrih a muihmel aa thlennak cu a zultu pathum hna an i lawmhnak calawng siloin anmah hna i hmailei ah lamkaltu rian`tuannak caah i remh chungawk kha a ruahchan mi a si. Cuhnuah minmei nih a khuh i “Hi pa cu keimah ka thim mi ka fa dawt a si. A bia kha ngai u” tiah Vancung in awthawng an theih. Cuhnuah Jesuh pakhat lawng kha an hmuh. Zultu hna cu an dai`hup i an hmuhton mi kha aho sin hmanh ah an chim hna lo. Jesuh Khrih muihmel thlennak a tinh hnawhchan mi cu Jesuh cu Messiah le Pathian fa a sinak kong tehte langhter ding le sifah temhnak a in hlanah a zultu hna an zumhnak fehter dingah a si.