Jesuh nih a Caan a kan pek ko

Tipil petu Johan lutan-thah a innak thawng pang cu Jesuh caah siseh, Johan hnu zultu hna caah siseh ngaihchiat awk ngai a simi thawngpang a si. Cucu nihin ni caah Bupi nih a kan thimpiakmi cathiang zong a si (Matthew 14:13-21).

Jesuh nih Johan a thihnak “thawngpang a theih tikah amah lawng tein hmun a kinnak hmun ah lawng in a kal.” Jesuh cu a unau a simi Johan caah sau hmanh ngaihchiat pi nak caan ngeih loin, “Jesuh hmun dang lei ah a kal timi thawngpang” a thei i a hnu in a zultu mipi hna an herh mi kha a tuah piak hna. Zei ruangah dah Jesuh nih hi mipi hi chikhat kal tak hna in a unau caah caan a pek hnga lo? “Nihin cu chikhat kaa din ta lai, ka zul rih hlah u,” tiah ti ding zong a si ko. Sihmanhsehlaw, “Jesuh cu lawng chung khan a hung chuak i mizapi kha a hmuh hna tikah a zaang an fak ngaingai,” tiin thawngthabia tialtu pa nih a ti. Zaangfah sawh lawng siloin a hnu biatak tein a zultu hna i “an mizaw hna zong kha a damter hna.”

Zanlei sang a hung si tikah zultu hna cu lungrethei in an um than hoi. Zeicah tiah cun mipi dihlak caah pek ding rawl tlamtling tein an ngeih lo caah a si. Sihmanhsehlaw Jesuh nih tuah u tiah a ti hna bang in zultu hna nih an tuah tikah “a eitu cu, nu le ngakchia rel loin, pa lawngte 5,000 hrawng an si.” Zultu hna nih lungawtomhnak zeihmanh ngeih loin Jesuh fial mi an tuah tikah khuaruahhar thil, Pathian thluachuah aa hung phuang. Mipi nih khim tein an ei dih hnu ah “zultu hna nih khan a tiltlawt rel hleihnih an char” than khawh hoi.

Dawtmi u le nau hna biatak duhnak lungthin he Jesuh kan kawl, a chimmi kan zulh a si ah cun, taksa lei in siseh, thlarau lei in siseh Jesuh nih kan herhmi damnak a kan pek ve ko lai. Jesuh nih a kan fial ning in kan nun, kan kal a si ah cun Pathian nih a veel-thluachuah liam cuah mah in a kan pek ve ko lai. Pathian sin in thluachuah kan hmuh tik zongah lawmhnak bia chim ding philh lo ding a si.