Jesuh nih a kan Cawnpiak duhmi hi Zeidah a si hnga? (Matt 5:38-42)

“Nan cungah that lonak a tuahtu hna kha lehrul hna hlah u, kan ti hna”. (Matt 5:39)

Nihin ni caah Bupi nih a kan thimpiak mi thawngthabia Matthai 5:38-42 hi kan nih minung hna caah zulh a har ngai mi cawnpiak nak pakhat a si. Jesuh nih a cawnpiaknak a ngaitu hna kha, “Mit caah mit ve, ha caah ha ve,” tiin an rak ti tawn kha nan theih. Sihmanhsehlaw kei nih cun, nan cungah that lonak a tuahtu hna kha lehrul hna hlah u, kan ti hna,” tiin a kan ti. Hi cawnpiak nak ah lehrulh duhnak lungthin zeihmanh ngeih loin intuarnak lungthin le thazang a let tuin ngeih dingin cawnpiak kan si. Zei ruangah dah a si hnga? 

Jesuh cu “Daihnak Siangpahrang” (Luke 2:10-14) a si. Nihin ni caah Bupi nih a kan thimpiakmi cawnpiak nak zong hi kum 2000 leng chung Khrihfa mi hna caah cawnpiakmi cawnpiaknak a si. Hi cawnpiaknak i a muru cu “Dawtnak” le “Daihnak” a um nka hnga ding kong a si. Mithiang Johan nih a cakuat chungah a tial mi cu, “Pathian cu dawtnak a si i dawtnak chungah a umi paoh cu Pathian chungah a um i a chungah Pathian a ummi a si,” tiah a ti (1John 4:16). 

Jesuh riantuannak le a chimmi paoh ah hin dawtnak in tuah mi lawng te an si. Jesuh tlangbawi ngan hmai ah bia an hal lio ah ralkap pakhat nih a bengh tikah Jesuh nih : “Ahmaan lomi bia ka chim a si ahcun, hika i a ummi hna hi cucu ahmaan lo tiah chim hna. Sihmanhsehlaw ka chimmi cu ahmaanmi a si tung ahcun, zeicahdah na ka bengh? tiah a leh,” tiah a ti (John 18:23). Jesuh nih hitin a chimmi hi a cawnpiak nak he aa pialkalh mi a si lo. Ahmaan mi thil cu a hmaan ning in i nunpi ding kha a kan cawnpiak duhnak a si. 

Thil ning cang loin a tuah tu hna le a hruaitu hna ruangah mi tampi harnak ton an si tikah phunglam ningin hruaitu hna le uktu hna nih rawhralnak a tuahtu hna kha an tuah ser ning bangin an in ter tawn ko hna. Vawlei cung hmanh ah hintin i uk le i hruai a si ahcun a dik lomi le a thurhnawmmi thil zeihmah an phanh khawh lonak hmun a simi Vancung ram chinchin ahcun thil sining in biakhiah piak a si ko lai: “Sihmanhsehlaw a thurhnawmmi cu khi khua chungah ahohmanh an lut kho lai lo; ningzah awk thil a tuahmi hna le lih a chimmi hna zong ahohmanh an lut kho lai lo,” (Biathlam 21:27) tiah a ti. Cun “Jesuh nih cun, ‘Ngaihmanh, ka ra zau lai. Mi kip an riantuanning cio ah pek awkah ka laksawng cu ka rak i put lai. Kei cu Alfa le Omega kha ka si, hmasa bik le hmanung bik, hrawmthawknak le donghnak ka si,’ tiah a ti” (Biathlam 22:12-13).

Dawtmi u le nau hna, kan nun caan tawi te chungah hin Jesuh nih a kan cawnpiak mi “Dawtnak lam le nun zia” hi i nun pi zungzal ding a si. Dawtnak cu Thiang Thlarau Pathian nih a chuahtermi laksawng a si tiah mithiang Paul zong nih a ti: “Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, thatnak, zumhawktlakmi sinak, toidornak le mah le mah i tei khawhnak tehna hi an si” (Galati 5:22-23). 

Pakhat le pakhat i dawtnak le i bawmh duhnak lungthin in Jesuh cawnpiak nak hi pehzulh khawh i zuam ding a si.