Jesuh nih Thla a kan Campiak

“Biatak kan chimh hna: Tuu luhnak kutka cu keimah hi ka si. Kei cu innka ka si. An lut an chuak lai i ram hno kha an hmu lai.” (Jn 10:7-8)

Jesuh nih kannih vialte hna cu tuu he a kan tahchunh. Tuukawm a um lawngah tuu hna caah himnak a um bantukin Jesuh Khrih kan sin a um lawngah himnak kan hmu ve. Tuu pawl an him khawh nak hnga ding caah tuukawm a that a hauh bangin Jesuh Khih cu kan himnak a si. A himmi tuukawm chung luh khawhnak hnga ding caah innka a hau. Vancung ramnuam kan phanh khawhnak hnga ding caah innka a si mi Jesuh Khrih lawngin luh khawh a si.

Tuukawm chungah tha tein kan luh khawh nak hnga ding caah zeibantuk lam dah kan zulh lai i khawzei innka in dah kan luh lai timi cu Jesuh Khrih nih fiang tein a kan cawnpiak cang. Cucu dawtnak innka a si. Jesuh Khrih nih a kan dawt ning cu aho pakhat hmanh thleidannak a um lomi dawtnak a si. Mikip nih zungzal nunnak kan cokhawhnak ding tiangin duhpiak mi le tinhpiakmi a hmunmi dawtnak a si.

Din lonak, zaan en in i tinak (injustice), thleidannak, duhfah hakkauhnak timi hna nih hin Pathian fanu fapa (tuu) sinak in a kan lohtlauter tawn. Cubantuk hna cu mifir le damiah bantuk an si hna i Pathian fanu fapa hna kha thah ding le nawn dingin a ngiar zungzal tu an si. Mithiang Peter nih, “Fimhring tein um u, ralring tein um u! Nan ral Khuachia cu, seh awkkawl ah, chiandeih bangin a vak cuahmah ko,” tiah a ti (1Peter 5:8). Paul zong nih, “Na thin a hun ahcun na thinhunnak kha sualnak chung i an luhpitu siter hlah; cun na thin hunnak cu ni tlakter hlah. Khuachia cu caan tha pe hlah,” tiah a ti (Efesa 4:27).

Jesuh Khrih nih, “Kei cu nunnak kha an ngeih i duhdim tein an ngeih nak hnga caah ka ra,” (Jn 10:10) tiah a ti. Cun Satan kutchung in kan luatnak hnga ding ca zongah thla a kan campiak (Jn 17:15).