Jesuh Siangpahrang

Jesuh Khrih cu minung sining in hrin a si hlaan in David siangpahrang changtu (David siangpahrang bangin bochan mi) a si nak siseh, a pennak cu dong lo a hmun hnga dingmi sinak siseh vancungmi nih Bawinu Mary sinah thawngthanhnak a rak tuah cia cang mi a si (Lk 1:32-33).

Jesuh cu minung cannak in hrin a si hnu ah nichuahlei mifim hna nih: “Judah siangpahrang a si lai dingmi ngakchia a chuakmi cu khuazei ah dah a um: a arfi nichuahlei in a chuah kha kan hmuh i amah biak awkah cun atu hi kan ra”tiah an ti(Matt 2:2). Jesuh cu siangpahrang hna nih an biakmi (Matt 2:11) le siangpahrang vialte hna i Siangpahrang , bawi vialte hna lak ah Bawibik a si(Rev 19:16).

Pilate nih “siangpahrang cu na si maw?” tiah a hal tikah, Jesuh nih siangpahrang a sinak kong siseh, a pennak cu a rawk kho lomi a si nak siseh a chim. Jesuh cu siangpahrang vialte hna lakah Siangpahrang nganbik a si ko nain vawlei cung mit in hmuh mi siangpahrang hna bang siloin, ahmaan mi le a dik mi biatak kha tehte khaan dingah a ra mi Siangpahrang a si(Jn 18:37).

Jesuh cu Satan pennak kha hrawh ding le Pathian pennak kha kan thinlung chungah a thar in ukter than dingin kan sinah a ra mi Siangpahrang a si. Jesuh cu Pathian taktak a si bangin minung taktak zong a si. Tipil nak kan ing hna i Jesuh cu kan Bawipa le kan Pathian, a kan uktu siding in kan cohlaan hna.

Kan Bawipa le kan Siangpahrang a simi Jesuh nawlbia chuahmi “Dawtnak nawlbia” kha kan zulh a herh. Cucu Amah hrimhrim nih a zulh mi lam a si i zulh ve dingin a ka fialmi zong a si. Kan zulh lo a si ah cun dantat kan si lai i kan zulh a si ah cun lunglawmhnak he thluachuahnak tampi pek kan si ko lai. Cun a Pennak Vanram zongah lunglawm hnangam tein um khawhnak nawl kan ngei ko lai.