Jesuh sin Kal hna u sih

Photo Credit

Jesuh Khrih a kal nak paoh ah mipi nih an zulh i thawngthabia a phuanmi an ngaih hna, khuaruahhar thil a tuah mi an hmuh hna. A min a hung thang ngaimi Jesuh Khrih hmuh a duh mi tampi an rak um. A cheu nih cun a thawngthabia phuanmi ngaih dingah an zulh i a cheu cu khuaruahhar thil a tuah mi hna zoh dingah a zulmi zong an um. Cun a cheu cu Jesuh Khrih kha sual phawt awkah le a biafoih awkah a zulmi zong an um hna.

Nihin ni caah Bupi nih ruah ti dingin le thazaang lak ti dingin a kan thimpiak mi cathiang cu (Mark 6:53-56)a si i Jesuh Khrih sinah damnak hmuh duh ah mipi nih an kal hnawhnak kong a si.

“Rili cu an tan i Genesaret ah lawng cun an tum i khika ah an lawng cu an hren. Lawng chungin an chuah cangka khan Jesuh a um kha mi nih cun an hngalh colh. Cucaah cuka ram ah cun khulrang in an kal i a um an theihnak paoh ah a zawmi kha lang in an hei put hna. Cun Jesuh cu a kalnak kip ah khan, khuate ah siseh, khuapi ah siseh, lo ah siseh, mi nih an mizaw hna cu chawdawrnak hmun ah khan an rak chuahpi cio hna i, a zawmi hna nih hin na puanki tal in tawng hna seh, tiah an nawl; cun a tawngmi paoh cu an dam.”

Dawtmi u le nau hna Jesuh Khrih min thiang le a thawngpang kan thei bal cio cang hna maw? Hmuh ding le zoh dingah kan kal bal cio cang hna maw? Damnak hmuh duh ah maw kan panh, asiloah khuaruahhar thil a tuah hnga dingmi zoh duh ah dah kan panh?

Thlarau damnak caah panh cio hna u sih. Kan chawva a karhnak hnga ding, khuaruahhar thil a kan tuah piak hnga ding caah cun panh hna hlah u sih; zeicah tiah cun a hmun lomi thil an si caah a si. Zungzal a hmun mi kan thlarau vancung ramnuam a phanh khawhnak hnga ding caah a herhmi thawngthabia, kan thlarau thazang caah le satan tukforhnak tei khawhnak thazang kan ngeih khawhnak hnga ding caah panh hna u sih. Nifatin kan nunnak ah Jesuh Khrih kan pawngte ah a um ko kha i theih in “Jesuh Khrih hmuh khawh” i zuam hna u sih.

Add new comment

2 + 0 =