Jesuh sinah kalpi ding an si

“Ngakchia cu ka sinah ra ko hna seh, dawn hna hlah u; zeicahtiah Vancung Pennak cu hi bantuk mi hna ta hi pei a si cu.”(Matt 19:14)

Jesuh Khrih nih nu le va ṭhen lo ding a si nak kong a cawnpiak dih hna hnu ah a sin a rami ngakchia hna thloh lo ding in zultu hna kha a ti hna. Jesuh sin panh a duhmi ngakchia hna zultu hna nih an rak kham hna bang khan a tu lio kan chan zongah hin lam phuntling hmang in kham an si ve cang. Fa le hna kha Pathian bia in cawnpiak hmasat hna loin phone in cawnpiak hmasat an si cang. Sunday school kai hlaan ah phone tongh ning le Facebook tonghtham ning an thiam hmasat cang.

Nikhat cu fa a ngei cang mi nu pakhat nih Siangbawi pakhat sinah a ra i: 

Nu = “Fr. zeitik hrawngah dah ka fa te hi Sunday school kaiter a ṭhat hnga?

Fr = Na fa cu kum zeizat dah a si cang?

Nu = Hmai thla cun kum (4) a si cang lai, thla khat lawng aa duh cang.

Fr = Asiahcun kum (4) na tlai cang” tiah a ti.

Fa le hna cu an kum a no lio te ah hin biaknak lei konglam he pehtlai in cawnpiak ding an si. Pathian bia an duh nak hnga ding caah le Pathian bia in an ṭhan khawhnak hnga ding caah nu le pa hna nih ṭhit hruai zungzal ding an si. Cucu nu le pa hna i ṭavuan zong a si. An upat hnu ah cun cawnpiak khawh ding a har cang sual lai. Nu le pa hna nih fa le hna kha an ngakchiat lio tein biakinn lei chuahpi hna loin le Pathian bia in an ṭhanter hna lo ruangah a herh lomi buaibainak hna a hnu ah tampi a hung chuah hi a si. 

Nu le pa hna hrimhrim nih fa le hna hmai ah tuahsernak in lam ṭha hmuhsak ding an si.

Nihin thawngṭhabia kan rel mi ah Jesuh nih, “Ngakchia cu ka sinah ra ko hna seh, dawn hna hlah u,” tiah zultu hna kha a ti hna. Hihi nu le pa hna le pakhat cio kan nunnak ah a biapi tuk mi zulh-ding, cawnpiak nak le biacah a si. Fale hna kha Jesuh sinah kal ter ko hna. “An nih hna cu an ngakchia tuk rih, zeihmanh an thei rih lai lo,” tiin ruat hrimhrim hlah. Na fale hna nih cartoons TV an zoh i a sullam an theih, an i leh khawh ko a si ah cun Bible tuanbia hna zong ṭha tein an theih khawh ve ko lai. Cawnpiak ding le hruaitu ṭha siding cu nangmah na rian a si ko. 

Joshua nih Israel mi hna sinah, “Kei le ka innchungkhar tu nih cun Bawipa kha kan biak ko lai,”(Joshua 24:15) tiah a rak ti hna. “Keimah cu a ti lo; keimah le ka innchungkhar” tiah a ti. A chungkhar dihlak in Pathian biak ding lawng aa rak i tim. A chungkhar hna kha Pathian sinah a hruai hna. 

Dawtmi nu le pa hna, fale hna he chungkhar tling tein biakinn lei ah kal khawh i zuam zungzal u. Missa kai ṭi khwh i zuam zungzal u. Fale hna zong Pathian bia he ṭhanter khawh i zuam zungzal u. Phaisa dih hau lo tein fale hna an no lio caan te ah rak cawnpiak khawh ding a simi hna kha cawnpiak khawh dingin i zuam zungzal u. Pathian a daw i a ṭihzah mi, Pathain bia he a ṭhangmi fale an si ah cun a sunglawi bikmi ro na pek khawh hna tinak a si ko.