Jesuh a tap(Lk 19:41)

“Siangpahrang uknak ram chung a um mi vialte hna nih kan pu pa hna Pathian cawnpiak nak phunglam le nawlbia hna kha hlaw hmanh hna sehlaw, kei le ka fa le nih cun Pathian cawnpiak nak nawlbia lawng kha kan zulh ko lai”. (1Maccabaees 2:20)

“Kei le ka innchungkhar tu nih cun Bawipa kha kan biak ko lai”. (Joshua 24:15)

“Pathian cu nangmah khamh awkah a rat caan kha na hngalh lo caah cuka hmun ah cun aa chonhmi lung pakhat hmanh leh loin an kaltakmi a um lai lo”. (Lk 19:44)

Israel miphun hna cu Pathian nih a hleiceh in a thimmi miphun, a dawtmi miphun an rak si hna caah, Profet si hna seh, a Fapa Jesuh Khrih hrimhrim kha siseh a rak thlah piak hna i a rak cawnpiak hna. Sihmahsehlaw an thinlung a hahtuk caah mi tlawm te lawng nih sual ngaihchihnak lungthin he Jesuh Khrih cawnpiak nak le Pathian Fapa a sinak kha an rak cohlaan khawh. Cutin an rak um caah Jesuh Khrih cu Jerusalem lei hoih in “a tap”(Lk 19: 41).

Siangpahrang Antiochus thlahmi ralbawi hna nih Mattathias le a fapa le hna kha siasal sin raithawi pekchanhnak tuah dingin an fial hna tikah Mattathias nih a el hna. Sihmanhsehlaw mipa pakhat a hung chuak i siasal sin raithawinak pek dingin ttheng cung a hung kai kha Mattathias nih a hmuh tikah a thin a hung tuk i mipa cu ttheng pawng cun a thah; cun Antiochus nih a thlah mi ralbawi pakhat zong cu ka hmun ah cun a thah ve. Mattathias le a fapa hna le Pathian nawlbia zulh dingin aa timmi hna cu siangpahrang tthalo Antiochus doh dingah khua chungin an chuak i ramlak ah an tli.

Joshua nih mipi sinah “Kei le ka innchungkhar tu nih cun Bawipa kha kan biak ko lai” tiin biakamnak a rak tuah ve. Hi mi hna hi Pathian nih thluachuahnak tampi a pekmi hna an si. Zeicahtiah cun Pathian nawlbia a zulmi an si caah a si.

Jesuh Khrih Pathian Fapa hrimhrim nih kum 3 chung thawngtha bia a rak chim lio ah biaknak lei hruaitu si hna seh, mi tampi nih an rak cohlaan duh lo caah Jesuh cu Israel mi hna nih an sunsak tukmi Jerusalem Khua lei hoih in a rak tap. Jesuh Khrih a tah cu mipi nih Pathian nawlbia an cohlaan duh lo caah a si. Pathian nawlbia cohlaan duh lo le zulh duh lo cu thluachuah um lo nak, ngaihchiatnak sining le thihnak a si caah a si.

Nang le kei teh Pathian “Nawl Bia Thiang” a cohlang i a zulmi kan si cang maw?